Շատ նրբահամ եւ շատ գեղեցիկ այս աղանդերը չի պարունակում ալյուր, հետեւաբար, գլյուտենի հետ խնդիր ունեցողները նույնպես կարող են վայելել այս թխվածքը:
Անհրաժեշտ մթերքները
Սեւ դառը շոկոլադ (ցանկության դեպքում կարող եք կաթնային վերցնել)- 150 գրամ
Կարագ-100 գրամ
Կարդացեք նաև
Շաքարավազ-100 գրամ
Վանիլի էքստրակտ (պարտադիր չէ)- 1 թեյի գդալ
Աղ-մեկ պտղունց
Ձվի սպիտակուց- 4 ձվի
Կիտրոնի հյութ կամ սպիտակ գինու կամ խնձորի քացախ-1 թեյի գդալ
Ձվի դեղնուց- 2 ձվի
Պատրաստման եղանակը
Այս աղանդերի համար անհրաժեշտ են հրակայուն տարաներ՝ կերամիկայից, ծայրահեղ դեպքում՝ ապակուց, բայց կարեւոր է, որ պատերը ուղղահայաց լինեն, թեք չլինեն, որպեսզի սուֆլեն կարողանա ուղիղ եւ ձիգ բարձրանալ: Հատուկ սուֆլեի համար վաճառվում են փոքրիկ, մեկ բաժնի համար նախատեսված տարաներ՝ ռամեկիններ: Կարող եք վերցնել նաեւ կրեմ-բրյուլեի համար նախատեսված ավելի մեծ չափսի հրակայուն ամաններ, եւ վերջ ի վերջո, կարող եք պատրաստել միանգամից մեծ տարայի մեջ եւ հետո գդալով բաժանել: Երբեմն պատրաստում են նաեւ սուրճի հրակայուն բաժակների մեջ, նույնպես շատ գեղեցիկ է լինում, բայց անպայման պետք է ուշադիր լինեք, որ հաստ պատերով եւ ջեռոցը դնելու համար նախատեսված, ցանկալի է կավից, թրծված բաժակ լինի:
Սկզբում պետք է ռամեկինները լավ կարագոտել, ապա շաքարավազ լցնել մեջը եւ շուռումուռ տալով ամբողջ պատերը շաքարապատել, ավելորդ շաքարավազը թափել: Տարաները այնուհետեւ դրեք սառնարան:
Ջեռոցը միացրեք 200 աստիճան: Մինչեւ ջեռոցը տաքանա, պատրաստեք խմորը: Կարագն ու շոկոլադը հալեցրեք կամ միկրոալիքային վառարանում կամ ջրային բաղնիքի վրա: Սպիտակուցը շատ լավ հարեք, քիչ-քիչ ավելացրեք շաքարավազը: Ապա ավելացրեք մի պտղունց աղն ու կիտրոնահյութը կամ քացախը: Շարունակեք հարել, որ դառնա պինդ բեզե:
Հալեցրած շոկոլադա-կարագային զանգվածին ավելացրեք վանիլի մզվածքը (պարտադիր չէ), խառնեք, որ դառնա միատարր զանգված եւ մի քիչ հովանա: Ավելացրեք ձվի դեղնուցը եւ խառնեք, որ կրկին միատարր դառնա: Ապա գդալ-գդալ ավելացրեք պատրաստի բեզեն:
Հանեք տարաները սառնարանից եւ պատրաստի զանգվածը լցրեք տարաների մեջ: Պետք է հնարավորինս լիքը լցվի: Հարթեցրեք վրան: Եվ բութ մատով եզրերը մի փոքր մաքրեք (տես՝ տեսանյութը), որպեսզի սուֆլեն լավ բարձրանա:
Դրեք ջեռոցը 13-15 րոպեով: Ընթացքում չբացեք ջեռոցի դուռը: Եթե մեկ ընդհանուր մեծ ամանով եք դրել, ապա, թերեւս, մի փոքր ավելի երկար ժամանակ պետք կլինի եփվելու համար:
Ջեռոցից հանեք տաք-տաք վիճակում եւ մատուցեք: Կարող եք վրան շաքարի փոշի ցանել կամ գլխիկը կոտրել ու մեջը հարած սերուցք կամ պաղպաղակ դնել, նոր մատուցել: Սառը վիճակում նույնպես համեղ է, սակայն հենց սառչում է, սուֆլեն նստում է, այնպես որ մատուցել պետք է անպայման տաք վիճակում:
Մանրամասները եւ նրբությունները՝ տեսանյութում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
