«Լավ կլիներ՝ արդարադատության նախարարն այս 7 ամսում ուսումնասիրություն աներ, որ հասկանայինք՝ կա՞ն, օրինակ, միաբնույթ գործեր, որոնք նույն դատավորին են մակագրվում, կամ ձեռքով մակագրման այբբենական կարգը պահպանվո՞ւմ է, թե ոչ»,-լրագրողների հետ ճեպազրույցում այսօր անդրադառնալով այն հանգամանքին, որ նախորդ տարի ԱԱԾ-ի կողմից դատական գործերի մակագրման էլեկտրոնային համակարգի առգրավման պատճառով գործերը մինչեւ օրս մակագրվում են ձեռքով՝ ասաց Երեւանի ընդհանուր իրավասության դատարանի դատավոր Արման Հովհաննիսյանը։
Նրա խոսքով․ «Եթե ձեռքով մակագրման գործընթացն արդեն իսկ կասկածելի է, հաջորդող գործընթացները եւս կասկածելի են լինում։ Հարց է առաջանում՝ դատարանն օրինակա՞ն ձեւավորված է, թե ոչ։ Դատավորներին դա մտահոգում է։ Յոթ ամիս անց չգիտենք՝ այդ համակարգիչների առգրավումն ինչո՞վ էր պայմանավորված, դա խիստ անհրաժե՞շտ էր, թե ոչ, դա քննի՞չն է որոշել, թե ոչ, հնարավո՞ր էր հիշողության կրիչները պահպանել, թե ոչ։ Այս բոլոր հարցերը պետք է պարզաբանվեն»։
Լուիզա ՍՈՒՔԻԱՍՅԱՆ
