«Դատական գործերի մակագրման էլեկտրոնային մակագրման համակարգը մեծ ծանրաբեռնվածություն ունի։ Այդ ծրագիրը 2008թ․-ին է գրվել։ Այս պահին քննարկվում է նոր ծրագիր ներդնելու հարցը, որը կապահովի նաեւ «Դատալեքս» կայքի հասանելիությունը»՝ ԱԺ մարդու իրավունքների պաշտպանության եւ հանրային հարցերի հանձնաժողովի նախաձեռնությամբ այսօր խորհրդարանում կազմակերպված «Կալանքի՝ որպես խափանման միջոցի կիրառման ինստիտուտի արժեզրկման, դատական գործերի ձեռքով մակագրման կարգի խախտումների եւ դրանց վերացման վերաբերյալ» թեմայով քննարկման ժամանակ հայտարարեց ՀՀ դատական դեպարտամենտի ղեկավարի տեղակալ Խաչիկ Ղազարյանը՝ անդրադառնալով մտահոգություններին, որ դատական գործերի էլեկտրոնային մակագրումը խնդրահարույց է։
«Դա երկար գործընթաց է, նոր ծրագրի ներդրումը բարդ է։ ԲԴԽ-ն եւս մտահոգ է նման հարցերի շուտափույթ լուծմամբ, որովհետեւ նման խնդիրները խոսակցությունների առիթ են տալիս։ ԱԱԾ-ում, ինչպես հայտնի է, քրեական գործ է հարուցված»,-հավելեց Խաչիկ Ղազարյանը։
Լուիզա ՍՈՒՔԻԱՍՅԱՆ
