Այսօր մի խումբ քաղաքացիներ բողոքի ցույց էին անում կառավարության շենքի առջեւ՝ ընդդեմ «խաղաղության դարաշրջանում» շարունակվող մարդկային կորուստների:
Նախաձեռնության հեղինակ Իզաբելլա Սարգսյանը լրատվամիջոցներին պարզաբանեց, որ սա ինքնաբուխ խաղաղ միջոցառում է, որով ինքը եւ մտահոգ քաղաքացիները բարձրաձայնում են խաղաղ ժամանակներում չդադարող մարդկային կորուստների անթույլատրելիության մասին: «Կառավարությունը պարտավոր է ապահովել քաղաքացիների կյանքի իրավունքը եւ անվտանգությունը: Մարդիկ սոցցանցերում անընդհատ գրում, դժգոհում, բողոքում, նեղվում են, որ նման բաներ են տեղի ունենում, սակայն այդ ամենը մնում է վիրտուալ աշխարհում: Ես ուղղակի ֆեյսբուքում գրեցի, որ ինչ-որ բան պետք է անել: Մարդիկ արձագանքեցին ու այսօր եկել են: Սա ըստ էության քաղաքացիների ինքնաբուխ բողոք է:
Մենք պահանջելով մարդու ապրելու իրավունքի ապահովում՝ նկատի ունենք ամեն ինչ, սկսած սահմանից: Ցանկացած պետություն, կառավարություն եւ իշխանություն պարտավոր է ապահովել իր քաղաքացու կյանքի անվտանգությունը: Բայց մենք տեսնում ենք, որ դա մեր երկրում տեղի չի ունենում: Երկրի ղեկավարությունը հայտարարում է, թե խաղաղության դարաշրջան է բերում եւ այլեւս զոհեր չեն լինելու: Բայց դա այդպես չէ: Երկու օր առաջ էլ սահմանին երեք երիտասարդ զինվոր զոհվեց Հայաստանի Հանրապետության սուվերեն տարածքում եւ երկու հոգի էլ վիրավորվեց»,- ասաց Իզաբելլա Սարգսյանը եւ ավելացրեց. «Էական չէ, թե այսօր այստեղ քանի հոգի ենք: Կարեւոր է, որ կառավարությունը տեսնի, որ այս ձայնը կա եւ մարդիկ պատրաստ են նաեւ փողոց դուրս գալ: Ուշադրություն դարձրեք. այստեղ մեծամասամբ կանայք են: Մենք մտահոգ ենք մեր երեխաների, եղբայրների, ծնողների առողջության համար: Այսպես երկար շարունակվել չի կարող, վերջապես պետք է այս իրողությանը վերջ տալ»:
Կարդացեք նաև
Աշոտ ՀԱԿՈԲՅԱՆ
