Հունական իշխանությունների` արտաքսման որոշումից հետո էլ պոլսահայ հայտնի լեզվաբան, հրապարակախոս Սևան Նիշանյանը Հայաստան տեղափոխվելու վերջնական որոշում չունի։ Առայժմ սպասում է բողոքարկման արդյունքին։
«Այս պահին զուգահեռաբար մի շարք իրավական գործընթացներ են ընթանում: Չափազանց խճճված և բարդ բյուրոկրատական ու վարչական մղձավանջի մեջ ենք հայտնվել: Չգիտեմ, թե ինչ արդյունք կլինի, առաջիկա 15 օրվա ընթացքում շատ զարգացումներ կարող են լինել, և այս ճգնաժամը կհաղթահարվի: Սակայն եթե խնդիրները չլուծվեն, ես շարունակելու եմ վարվել իմ փաստաբանների խորհուրդների համաձայն: Ճնշում են գործադրում, որպեսզի ինքնակամ լքեմ երկիրը, սակայն ես չեմ ուզում հեռանալ, տեսնենք ինչ կլինի», – «Ազատության» հետ զրույցում ասաց Նիշանյանը՝ հավելելով․ – «Հայաստանի իշխանություններն ու ժողովուրդը մեծ նվիրումով ու սրտացավորեն ինձ աջակցեցին, և ես շատ երախտապարտ եմ ու ինչ-որ կերպ պետք է փոխհատուցեմ: Սիրով կգամ Հայաստան, Երևան, սակայն երբ և ինչքան ժամանակով՝ դեռ չեմ որոշել»:
2017 թվականի ամռանը թուրքական բանտից փախուստի դիմած և հարևան Հունաստանում ապաստանած Նիշանյանին հունական իշխանություններն անցած շաբաթ երկրից հեռանալու համար 15 օր ժամանակ են տվել: Թուրքիա արտաքսվելու դեպքում նրան երկարատև բանտարկություն է սպառնում, Հունաստանի իշխանությունները, սակայն, Նիշանյանի հայեցողությանն են թողել, թե որ երկիր կգնա նա՝ 65-ամյա մտավորականը նաև Հայաստանի քաղաքացիություն ունի։ Դեկտեմբերի վերջին տեղական իշխանությունները չերկարաձգեցին Նիշանյանի կացության իրավունքը, իսկ հաջորդ օրը նա ձերբակալվեց՝ Հունաստանում արդեն անօրինական գտնվելու պատճառաբանությամբ։
Նիշանյանն ու նրա փաստաբանները այդ որոշումն ապօրինի են համարում, քանի որ նա ամուսնացած է Հունաստանի քաղաքացու հետ և երկրում մնալու օրինական հիմք ունի: Եթե բողոքարկումներն արդյունք չտան, նա ստիպված է ինքնակամ լքել երկիրը:
Կարդացեք նաև
Մանրամասները՝ սկզբնաղբյուր կայքում
