«Ասել են, թե ոչ հեղափոխական, հակահեղափոխական կերպար է Թաթոյանը, լո՞ւրջ եք ասում: Ովքե՞ր են ասողները, այն իշխանության ներկայացուցիչները, որոնք ամբողջ ծավալով հրաժարվել են հեղափոխական գաղափարներից»,- «Մեդիա կենտրոնում» «Կառավարելի ՄԻՊ ունենալու միտումներ. կա՞ նման վտանգ» թեմայով քննարկման ժամանակ վրդովվեց «Հելսինկյան ասոցիացիա» ՀԿ նախագահ Նինա Կարապետյանցը:
Նինա Կարապետյանցին վրդովեցնում է այն, որ սա ասում են ՔՊ-ական այն պատգամավորները, որոնք հեռացել են հեղափոխական արժեքներից: Իրավապաշտպանի կարծիքով՝ ՀՀ-ում օմբուդսմենի ինստիտուտն ամենակայացածներից է. «Այնպես չէ, որ միշտ հիացած եմ եղել մեր բոլոր օմբուդսմեններով: Բոլորի հետ ունեցել ենք տարաձայնություններ, բայց ուզում եմ նշել, որ ամեն նախորդ օմբուդսմեն թողել է իր անդառնալի հետքը: Սա ՀՀ-ում ամենակայացած ինստիտուտներից է»:
Նինա Կարապետյանցը կարևորում է, թե ով կլինի հաջորդ օմբուդսմենը, քանի որ նրա բնորոշմամբ՝ մենք չունենք այն աստիճան կայացած համակարգ, որը դուրս կթողնի իր պաշտոնին չհամապատասխանող անձին:
Խոսելով ՀՀ իշխանությունների վարած քաղաքականության մասին՝ իրավապաշտպանն ասաց. «Ցավալիորեն կարծում եմ, որ գործող իշխանություններն ունեն իրենց պլանները, որոնց մասին չեն բարձրաձայնում, որոնց մասին հանրությունն իմանում է, այսպես ասած, հետմահու: Ուղղակի ժողովրդին տեղյակ են պահում. մի մասն այնքան չի ընդունում նախորդ իշխանություններին, որոնց ժամանակ ինքը դժվարություններ է ունեցել, և այդ հակադրությունը, որն անընդհատ խաղարկվում է, այս հակասության մեջ հանրությունը սկսում է ոչ համարժեք մոտեցում դրսևորել: Ժողովուրդ ջան, դուք ընտրել եք իշխանություն և պահանջ պիտի ներկայացնել նրան»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
