Քաղաքացիական օրենսգրքի փոփոխության համաձայն՝ այլ անձանց վիրավորելու կամ զրպարտելու մեջ մեղավոր ճանաչված մարդիկ կտուգանվեն նախկինում սահմանված տուգանքի եռապատիկի չափով՝ համապատախանաբար մինչև 3 մլն և մինչև 6 մլն դրամ: Խորհրդարանականները պնդում են, որ այդ միջոցներն անհրաժեշտ են ապատեղեկատվության և վիրավորական բառապաշարի դեմ պայքարելու համար:
«Լրագրողների պաշտպանության կոմիտե» (CPJ) միջազգային իրավապաշտպան կազմակերպությունն իր կայքում գրել է, որ մամուլի ազատության ջատագովները CPJ-ի հետ զրույցում մտավախություն են հայտնել, որ նոր օրենքները կարող են օգտագործվել որպես գործիք՝ ճնշելու քննադատող լրատվամիջոցներին, և կհանգեցնեն ինքնագրաքննության՝ հատկապես հաշվի առնելով այն հանգամանքը, որ մամուլի դեմ դատական հայցերը վերջին տարիներին կտրուկ ավելացել են: Նաեւ նշել են, որ Հայաստանի խորհրդարանից եւ Հայաստանի վարչապետի մամուլի խոսնակի գրասենյակից չեն պատասխանել CPJ-ի հարցումներին:
Այս առնչությամբ Aravot.am-ը պարզաբանում խնդրեց ԱԺ նախագահի մամուլի խոսնակ Ծովինար Խաչատրյանից: Նա պատասխանեց. «Տվյալ միջազգային կազմակերպությունից ԱԺ աշխատակազմի եւ ՀՀ ԱԺ նախագահի աշխատակազմի համապատասխան էլեկտրոնային հասցեներին որեւէ հարցում կամ նամակ չի ստացվել: Ձեր կայքից ծանոթանալով միջազգային իրավապաշտպան կազմակերպության հրապարակմանը՝ անմիջապես իրենց կայքում առկա էլեկտրոնային փոստին ճշտող նամակ եմ ուղարկել, որին դեռ չեն պատասխանել: Եթե հարցումը ուղարկվի, բնականաբար պատասխանները մեր կողմից չեն ուշանա»:
Հռիփսիմե ՋԵԲԵՋՅԱՆ
Կարդացեք նաև
Լուսանկարը՝ Ծովինար Խաչատրյանի ֆեյսբուքյան էջից
