ՀՀ Մարդասիրական եւ ականազերծման խումբը Սուրիոյ ճգնաժամային իրավիճակին բերումով տարիներէ ի վեր կը շարունակէ իր առաքելութիւնը Հալէպի մէջ՝ յանուն Սուրիոյ բարեկամ ժողովուրդի բարօրութեան:
Այս առիթով «Գանձասար» հարցազրոյց ունեցաւ ՀՀ Մարդասիրական խումբի ներկայացուցիչ, գնդապետ Արկատի Տօնոյեանի հետ՝ մօտէն ծանօթանալու համար վերջերս կատարուած աշխատանքներուն:
«Գանձասար»- Յարգելի՛ պրն. Արկատի, կը խնդրենք ներկայացնէք ՀՀ մարդասիրական առաքելութեան խումբի 2021 տարուան աշխատանքներուն ամփոփումը։
Արկատի Տօնոյեան- 2021-ը իր բոլոր դժուարութիւններով հանդերձ մարդասիրական խումբին առաքելութեան վրայ որեւէ բացասական ազդեցութիւն չունեցաւ: Մասնաւորապէս 2021 թուականին մարդասիրական եւ փորձագիտական կեդրոնի ականազերծման խումբը ականազերծած է շուրջ 360 հազար քառակուսի մեթր տարածք եւ յանձնած է Հալէպի նահանգային իշխանութիւններուն, իսկ բժշկական խումբը տեղաբնակներէն մօտաւորապէս 12.000 անձի բուժօգնութիւն ցուցաբերած է, ինչպէս նաեւ մէկ տարուան ընթացքին 6 թոննոց դեղորայք յանձնած ենք Հալէպի բժշկական հաստատութիւններուն:
Կարդացեք նաև
Հալէպի եւ ընդհանրապէս Սուրիոյ տագնապալի օրերուն, մարդասիրական խումբը ոչ մէկ ատեն դադրեցուց իր աշխատանքը: Թէեւ եղան սահմանափակումներ, եղան տնտեսական դժուարութիւններ, նոյնիսկ անվտանգութեան իրավիճակը որեւէ ձեւով խոչընդոտ չհանդիսացաւ մարդասիրական խումբի աշխատանքներուն: Յաւուր պատշաճի կատարուած են բոլոր առաջադրանքները, որոնց վառ ապացոյցն են երախտիքի խօսքերը, շնորհակալութիւններն ու շնորհաւորագիրները փոխանցուած սուրիական իշխանութիւններուն կողմէն:
Կ’ուզեմ նշել, որ չկան դժուարութիւններ, որոնք կը խոչընդոտեն մարդասիրական խումբին աշխատանքները եւ յոյսով եմ, որ նոյն ջանասիրութեամբ կ’իրականացնենք մեր աշխատանքները՝ ի նպաստ եւ ի բարօրութիւն Սուրիոյ բարեկամ ժողովուրդին:
«Գ.»- Վերջերս մամուլէն տեղեկացանք, թէ մարդասիրական առաքելութեան խումբը ծրագիր ունի նաեւ մայրաքաղաք Դամասկոսի մէջ։ Մանրամասնութիւններ կարելի՞ է իմանալ այս մասին։
Ա.Տ.- Այո՛, ճիշդ նկատած էք: 25 Հոկտեմբերին ՀՀ Մարդասիրական ականազերծման ու փորձագիտական կեդրոնին եւ Դամասկոս հաստատուած միջազգային ականազերծման գրասենեակին միջեւ կնքուած է յուշագիր եւ մեր խումբը Սուրիոյ կառավարութեան հովանիին տակ ուղղուած է Դամասկոս: Տեղակայուելով Դամասկոս, խումբը իր աշխատանքները իրականացուցած է Դամասկոսի արուարձաններու Տարայա բնակավայրին մէջ: Այս առաքելութեան առանձնայատկութիւնը այն է, որ աննախադէպ է ՀՀ պատմութեան մէջ հայկական խումբի մասնակցութիւնը միջազգային առաքելութեան՝ ՄԱԿ-ի շրջագիծէն ներս եւ որպէս ականազերծողներ մեր խումբի մասնագէտներուն ընդգրկումը այս ծրագիրին մէջ: Աւելի մանրամասնութիւններ կարելի է ներկայացնել յառաջիկայ աշխատանքներուն, ձեռքբերումներուն եւ համագործակցութեան մասին տեսանելի արդիւնքներու հասնելու պարագային: Սակայն կարելի է ըսել, որ այս եռանդով խումբը կրնայ բաւական աշխատանք իրականացնել:
Հարցազրոյցը վարեց
Լուսին Ապաճեան-ՉիլԱբօշեան
Հոդվածն ամբողջությամբ՝ «Գանձասար» շաբաթաթերթի այսօրվա համարում:
