«Ինձ համար ԲԴԽ որոշումը կանխատեսելի չէր: Բոլոր դեպքերում պատրաստ էի ամեն արդյունքի»,- Բարձրագույն դատական խորհրդի որոշման հրապարակումից հետո լրագրողների հետ զրույցում կարծիք հայտնեց Երևան քաղաքի ընդհանուր իրավասության դատարանի դատավոր Զարուհի Նախշքարյանը:
Հիշեցնենք՝ ՀՀ բարձրագույն դատական խորհուրդը մերժեց արդարադատության նախարարության միջնորդությունը՝ Երևան քաղաքի ընդհանուր իրավասության դատարանի դատավոր Զարուհի Նախշքարյանին կարգապահական պատասխանատվության ենթարկելու վերաբերյալ:
Դատավորն ասաց՝ լավ է, որ նման որոշում է կայացվել միաձայն ու շարունակեց. «Իմ ցանկությունը կլինի այն, որ այսուհետ արդարադատության նախարարությունն ավելի մեծ ջանք գործադրի՝ կարգապահական վարույթների հարուցման դեպքում և ոչ թե հիմնական շեշտը դնի քանակի վրա, այլ հիմնավորվածության: Չի կարող դա ինքնանպատակ լինել, և արդարադատության նախարարն իրեն դուր չեկող անձանց հեռացնել համակարգից: Լիահույս եմ, որ մեր դատական իշխանության ներկայացուցիչները, իմ գործը տեսնելով՝ կլծվեն համոզմունքով և այլևս չեն հիասթափվի, համարձակ կլինեն և անկախ կշարունակեն գործել»:
Խոսելով դատավորների ընդհանուր ժողովի մասին՝ Զարուհի Նախշքարյանը տեղեկացրեց՝ պաշտպանելու է Ալեքսանդր Ազարյանի թեկնածությունը:
Կարդացեք նաև
Տաթև ՀԱՐՈՒԹՅՈՒՆՅԱՆ
