Սյունիքի մարզի ընդհանուր իրավասության դատարանում շարունակվում է 2021թ.-ի ապրիլի 21-ին վարչապետ Նիկոլ Փաշինյանի կողմից Սյունիքի մարզի Մեղրի եւ Ագարակ քաղաքներ այցը խոչընդոտող անձանց դատաքննությունը։ Ամբաստանյալի աթոռին գտնվող 27 անձանցից մեկը անչափահաս է։ 27-ից 23-ին մեղադրանք է առաջադրվել ՀՀ քրեական օրենսգրքի 258 հոդվածի 1-ին մասով՝ խուլիգանություն, դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով։
4 ամբաստանյալի մեղադրանքը ավելի խիստ է՝ ՀՀ քրեական օրենսգրքի 258 հոդվածի 3-րդ մասի 1-ին, 2-րդ կետեր՝խուլիգանություն, որը կատարվել է մի խումբ անձանց կամ կազմակերպված խմբի կողմից եւ զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով։ 27-ի նկատմամբ էլ խափանման միջոց է ընտրվել ստորագրություն չհեռանալու մասին։
Հունվարի 10-ին նախատեսված նիստը չկայացավ։ Ամբաստանյալներից մեկը դիմել էր դատարան՝ միջնորդելով նիստը հետաձգել, քանի որ հիվանդության պատճառով չի կարող մասնակցել։ Նախագահող դատավոր Նապոլեոն Օհանյանը հաջորդ դատական նիստը նշանակեց փետրվարի 4-ին։
Ավելացնենք, որ այս գործով դեռեւս կայացել է մեկ դատական նիստ անցած տարի՝ սեպտեմբերի 30-ին, որի ընթացքում դատարանը ճշտեց ամբաստանյալների ինքնությունը։ Դրանից հետո նշանակված եւս երկու նիստ՝ նոյեմբերի 2-ին եւ դեկտեմբերի 3-ին , հետաձգվել են տարբեր պատճառներով։
Կարդացեք նաև
Արմեն ԴԱՎԹՅԱՆ
