Ղազախստան հայ զինծառայողներ ուղարկելու որոշումից հետո քննարկվում է այն հարցը, որ վարչապետ Փաշինյանը պետք է ներողություն խնդրի Մարտի 1-ի գործով անցնող Ռոբերտ Քոչարյանից, Յուրի Խաչատուրովից, Սեյրան Օհանյանից, քանի որ զանգվածային անկարգությունների գործով նրանց գործողություներն են վիճարկվում, մինչդեռ ինքը նույնն է անում՝ զորք է ուղարկում Ղազախստան՝ ցուցարարներին ցրելու համար: Այս քայլով արդյոք Փաշինյանը չի՞ արդարացնում 2008-ի Մարտի 1-ին իշխանությունների գործողությունները:
Այսօր այս առնչությամբ լրագրողների հարցին ի պատասխան՝ Քոչարյանի փաստաբան Հայկ Ալումյանն ասաց. «Պարոն Փաշինյանը միշտ պնդել է, որ զորքը չի կարող օգտագործվել ներքին զինված խռովությունները ճնշելու համար: Բայց նույն պարոն Փաշինյանն իր գործողություններով, ըստ էության, ասում է, որ կարելի է Ղազախստանում Հայաստանի զորքերն օգտագործել՝ ներքին խռովությունները ճնշելու համար: Այսինքն, ըստ պարոն Փաշինյանի, Հայաստանում չեն կարող զորքերն օգտագործվել՝ Հայաստանի ներսում զինված խռովությունները ճնշելու համար, բայց կարող են օգտագործվել Ղազախստանում: Եվ երկրորդը՝ պարոն Փաշինյանը, ըստ էության հայտարարում է, որ Հայաստանում կարելի է կազմակերպել զինված խռովություններ, ինչը իր կողմից արվեց 2008-ի Մարտի 1-ին, բայց այ Ղազախստանում չի կարելի, դե հիմա եկեք տրամաբանությունը հասկացեք: Զուտ իրավաբանական տրամաբանությունը այս ամեն ինչի ինձ համար գաղտնիք է»:
Հռիփսիմե ՋԵԲԵՋՅԱՆ
