Հայաստանի Եվրոպական կուսակցությունն իր խիստ եւ անվերապահ անհամաձայնությունն է հայտնում Ղազախստան ՀԱՊԿ զորքեր ուղարկելու ՀՀ վարչապետ Նիկոլ Փաշինյանի ս․թ․ հունվարի 6-ի հայտարարության կապակցությամբ։ Հատկապես զավեշտալի է նման որոշումը Հայոց տոմարով Ս․Ծննդյան տոնի օրը։
Բռնապետների «ակումբի» վերածված ՀԱՊԿ/ԵԱՏՄ կառույցներին ՀՀ բուն մասնակցությունն արդեն իսկ կործանարար դեր խաղաց մեր երկրի համար 2020 թ․ Արցախյան պատերազմի օրերին եւ դրանից հետո ծավալվող զարգացումներում, երբ ՀԱՊԿ-ի երկրները ոչ միայն չմիջամտեցին ի պաշտպանություն սույն կառույցի անդամ Հայաստանի Հանրապետության, այլ ռազմական, տնտեսական, տեղեկատվական եւ քաղաքական աջակցություն էին ցուցաբերում Ադրբեջանի զավթիչ գործողություններին։
Այս ամենից հետո ՀՀ անդամակցությունը եւ առավելեւս նախագահությունը ՀԱՊԿ-ում զավեշտալի է եւ անընդունելի։ Ավելին՝ ՀՀ ներքաշումը Ղազախստանի ներքին գործերին անթույլատրելի քաղաքական սխալ է, որն ավելի աններելի է ու վտանգավոր, քան 2020 թ․օգոստոսին Բելառուսի բռնապետ Լուկաշենկոյին հասցեագրված շնորհավորանքը նախագահական բռնի եւ կեղծված ընտրություններում նրա «հաղթանակի» կապակցությամբ։ Բացի դա՝ ՀՀ որեւէ միջամտությունը Ղազախստանի ներքին գործերին ՀԱՊԿ ձեւաչափով անթույլատրելի եւ անչափ վնասաբեր կլինի ՀՀ համար միջազգային ասպարեզում, փաստացի ոչնչացնելով Արցախյան հիմնախնդրի շուրջը ծավալվող վերջին զարգացումների բարենպաստ արդյունքները եւ չեղարկելով «Գագաթնաժողով հանուն ժողովրդավարության» ԱՄՆ նախաձեռնությամբ ՀՀ առջեւ բացվող հեռանկարները։
Ելնելով վերը նշվածից, Հայաստանի Եվրոպական կուսակցությունը համարում է ՀՀ միջամտությունը եւ որեւէ մասնակցությունը Ղազախստանի ներքին գործերին ՀԱՊԿ/ԵԱՏՄ ձեւաչափով անընդունելի, վտանգավոր եւ կործանարար մեր պետության համար եւ հորդորում է ՀՀ իշխանություններին զերծ մնալ նման քայլերից։
Կարդացեք նաև
ՀԵՎԿ
2022 թ․ հունվարի 6
Երեւան
