Վաղ առավոտից մեծաքանակ ոստիկաններ, այդ թվում՝ բերետավորներ, շրջափակել են Վարդենիս խոշորացված համայնքի համայնքապետարանի մուտքը: Նրանք նորընտիր ավագանու անդամներին թույլ չեն տալիս մտնել համայնքապետարան, որտեղ նախատեսված է ավագանու «Ահարոն Խաչատրյան» եւ «Միասնական Վարդենիս» դաշինքների միասնական քվեարկությամբ ընտրված համայնքապետ Ահարոն Խաչատրյանի երդմնակալության արարողությունը:
«Միասնական Վարդենիս» դաշինքի անդամ Դավիթ Շահնազարյանը լրատվամիջոցներին տեղեկացրել է, որ երդմնակալության արարողությունը օրինական լինելու համար անհրաժեշտ է, որ նիստին ներկա լինի ավագանու 14 անդամ, եւ իրենց ու «Ահարոն Խաչատրյան» դաշինքներն այդ քվորումն ապահովում են:
ՔՊ-ն, որը ընտրությունների արդյունքների ամփոփման արդյունքներով փոքրամասնություն է կազմել, համայնքապետի ընտրությունը տապալելու նպատակով չէր մասնակցել նիստին: ՔՊ-ն չի ընդունում Ահարոն Խաչատրյանի ընտրության արդյունքները եւ պահանջել է համայնքապետի նոր ընտրություն կազմակերպել հունվարի 3-ին:
Ավագանու անդամներից մեկը լրատվամիջոցներին ասաց. «Նայելով այս իրավիճակին՝ տպավորություն է, թե «Քաղաքացիական պայմանագիր» կուսակցությունը քաղաքացիական պատերազմ է սկսել Վարդենիսի բնակիչների դեմ, որովհետեւ դեկտեմբերի 30-ին ավագանու նիստը կայացավ օրենքի սահմաններում: Մենք, առաջնորդվելով սահմանադրական կանոններով, ավագանու նիստը կայացրինք: ՔՊ-ականները փորձում էին խոչընդոտել: Նաեւ միջամտում էր անմիջականորեն կառավարությունը, ոստիկանական զորքերը: Դա շատ վատ էր: Ինչեւէ, մեզ հաջողվեց բացատրել, ցույց տալ, որ նիստը պետք է կայանա ու կայացավ:
Կարդացեք նաև
Մենք նախօրոք հայտարարել ենք եւ կայքում տեղադրվել է, որ այսօր երդմնակալության արարողությունը լինելու է: Ես կարծում եմ, որ եթե ամեն ինչը սահմանադրական կանոններին համապատասխան է, մեր ոստիկանները պարտավոր են ոչ թե փակել քաղաքապետարանի մուտքը, այլ պարտավոր են ապահովել պայմաններ, որպեսզի առանց որեւէ խոչընդոտի այդ նիստը եւ երդմնակալության արարողությունը կայանան: Չեմ կարծում, թե որեւէ գիտակից մարդ կընդունի այս իրավիճակը: Ես սա համարում եմ կառավարության կողմից սահմանադրության ոտնահարում: Եթե սահմանադրության ոտնահարում կատարում է որեւէ մեկը, դրա համար դատապարտվում է, բայց եթե դա անում է կառավարությունը, ես դատապարտում եմ կառավարության այս քայլերը» :
Աշոտ ՀԱԿՈԲՅԱՆ
ՔՊ-ն գեազանցեց բոլոր նախկնիններին ու դարձավ ամենանախկինը։