«Հաշվի առնելով այն հանգամանքը, որ երեկ Հայաստան են վերադարձել ևս հինգ գերիներ, դատարանը վերսկսեց գերությունից վերադարձած զինծառայողների գործի վարույթը, նիստը կկայանա այսօր՝ 17։30-ին», – այս մասին Aravot.am-ի հետ զրույցում հայտնեց գերությունից վերադարձած Ռոբերտ Նալբանդյանի պաշտպան Ռուբեն Մելիքյանը:
Պաշտպանը հիշեցրեց, որ Քննչական կոմիտեն միջնորդել էր երկարաձգել Ռոբերտ Նալբանդյանի կալանավորման ժամկետը, որի կապակցությամբ դատարանի որոշումը պետք է հրապարակվեր այսօր, և հայտնեց, որ դատարանը միայն վերսկսել է գործի վարույթը, իսկ թե երբ որոշում կկայացնի Ռոբերտ Նալբանդյանի կալանավորման մասին՝ պաշտպանին հայտնի չէ։
Նշենք, որ Ռոբերտ Նալբանդյանն ունի երեք անչափահաս երեխա։ Մեկ տարվա գերության արդյունքում ունի կողոսկրերի կոտրվածքներ։
Հիշեցնենք, որ Ռոբերտ Նալբանդյանը հայրենիք էր վերադարձել 2021 թվականի դեկտեմբերի 4-ին։ Գերեվարվել էր 2020 թվականի նոյեմբերի 16-ին՝ ադրբեջանական սադրանքի հետևանքով։
Կարդացեք նաև
Այժմ նրան մեղադրանք է առաջադրվել մարտական հերթապահություն կամ մարտական ծառայություն կրելու կանոնները խախտելու համար, որն առաջացրել է ծանր հետևանքներ։ Ռոբերտ Նալբանդյանին սպառնում է քրեական օրենսգրքով սահմանված պատիժ՝ ազատազրկում երեքից ութ տարի ժամկետով։
Նելլի ԳՐԻԳՈՐՅԱՆ
