«Արցախի Հանրապետության գործելակերպը և դիրքորոշումը հստակ է. Արցախի Հանրապետությունը շարունակում է միջազգային ճանաչման գործընթացը: Արցախի Հանրապետությունը սեփական տարածքային ամբողջականության վերականգնումը սահմանել է որպես ռազմավարական նպատակ: Արցախի Հանրապետությունը օգտագործում և օգտագործելու է ՌԴ խաղաղապահության ներկայության ժամկետն իր պետականության ամրապնդման համար»,-Aravot.am-ի հետ զրույցում ասաց ԱՀ նախագահի միջազգային հարաբերությունների հարցերով խորհրդական Նելլի Բաղդասարյանը:
Մեր զրուցակցի գնահատմամբ, ԱՀ նախագահի և ԱՀ ԱԺ հայտարարությունները ամենաուղիղ կերպով արտահայտել են հանրապետությունում առկա հասարակական-քաղաքական տրամադրությունները՝ դեկտեմբերի 24-ին ՀՀ վարչապետի կողմից արտահայտված տեսակետների առիթով:
«Համակեցության և ընդհանրապես Ադրբեջանի կազմում հայտնվելու անգամ խոսույթն անթույլատրելի է, լինի դա գրավոր, բանավոր, թե արդեն քննարկված հիմքերով: Կարգավորման հիմնական ձեւաչափում կամ ձեւաչափից դուրս ծավալված գործընթացները, որոնք ԱՀ-ն կարող են տանել Ադրբեջանի կազմ՝ մեր տեսլականում տեղ չունեն: Արցախի Հանրապետությունը Ադրբեջանի կազմում որևէ կարգավիճակ չի դիտարկել և երբևէ չի դիտարկելու: Ըստ այդմ, վտանգավոր է որևէ խոսույթ, որը կարող է արժեզրկել ԼՂՀ հռչակումը, ինքնորոշման անցած ուղին, համայն հայության պայքարը հանուն Արցախի: Այո’, մենք գիտակցում ենք , որ կարգավիճակի խնդիրը կարող է ձգվել տասնամյակներ, բայց ստեղծված պայմաններում «հետաձգված կարգավիճակը= status quo»,- ասաց Նելլի Բաղդասարյանը:
Նելլի ԳՐԻԳՈՐՅԱՆ
