Արցախի գրողների միության նախաձեռնությամբ այսօր Ստեփանակերտի Գրիգոր Նարեկացի համալսարանում կայացել է բ.գ.թ., դոցենտ Զարինե Սառաջյանի «Արցախասեր» բանաստեղծությունների ու էսսեների գրքի շնորհանդեսը։
Հեղինակի խոսքով` վերնագրի ընտրությունը նաև գաղափարախոսություն և հրամայական պետք է լինի յուրաքանչյուր հայի համար, որն էլ կնպաստի Արցախ աշխարհի ապրելուն։
Գրքի խմբագիրը գրականագետ Արմեն Ավանեսյանն է։ Վերջինս գրքի առաջաբանում գրել է, որ Զարինե Սառաջյանի գրքի հիմքում ընկած է արարչության նկատմամբ անվերապահ հավատը։
Կարդացեք նաև
-Զարինե Սառաջյանը, հավատարիմ բառի մոգական հմայքին, իր հմայախոսությամբ ու աղոթքով, խոհականությամբ ու զգացմունքային ջերմությամբ մարդուն է վերադարձնում բառը` «ի սկզբանե բան էր»-ի խորհրդով,-նշում է Արմեն Ավանեսյանը։
-Արցախասիրությունը գաղափար է, որը ապրելու է, քանի կապրի ճշմարիտ հայը, ճշմարիտ արժեհամակարգով առաջնորդվող մարդը,-վստահեցնում է Զարինե Սառաջյանը, ավելացնելով,-որպես Արցախի մտավորական՝ ես ինձ պարտավորված եմ զգում իմ փոքրիկ լուման ունենալու մեր վիրավոր Արցախը ապրեցնելու սուրբ գործում, որին ուղղված էր նաև այս գրքի ծնունդը։ Թող միշտ ապրի Արցախը, արցախասիրությունը։
Ելույթներ ունեցան Արցախի գրողների միության նախագահ, բ.գ.դ., պրոֆեսոր Վարդան Հակոբյանը, բանաստեղծ, բ.գ.դ., պրոֆեսոր Սոկրատ Խանյանը, բ.գ.թ. Նոնա Դավթյանը, բանաստեղծ Արիս Գրիգորյանը, գրողներ Հերմինե Ավագյանը, Անահիտ Գաբրիելյանը, գրականագետ, բ.գ.թ. Ամալյա Գրիգորյանը։
Գրքում տեղ գտած ստեղծագործություններից ասմունքեցին Արցախի մայր բուհի ուսանողները։
Վովա ԱՐԶՈՒՄԱՆՅԱՆ
Լուսանկարները տրամադրել է Զարինե Սառաջյանը
