Հայաստանը շարունակում է մնալ Արցախի Հանրապետության սոցիալական ապահովության հիմնական երաշխավորը: Այսօր այս մասին ասաց ՀՀ աշխատանքի եւ սոցիալական հարցերի նախարար Նարեկ Մկրտչյանը: Նա «Արմենպրեսի» մամուլի սրահում ամփոփեց այս տարվա գործունեության արդյունքները, նշեց, որ Հայաստանի կառավարությունը օգնելու ծրագրեր կիրականացնի նաեւ 2022 թվականի առաջին եռամսյակում: Նախարարի խոսքով` 44-օրյա պատերազմից հետո ՀՀ կառավարությունը շուրջ երկու տասնյակ ծրագրեր է իրականացրել Արցախում բնակիչների համար։
Արցախցիներին տրամադրվել է սոցիալական աջակցություն, ապահովել են կացարանով, զբաղվածության խնդիրներ են լուծել:
«Մենք արդեն սկսել ենք մտածել նաեւ զարգացման ծրագրերի կազմակերպման մասին։ Այդ ծրագրերը մեզ թույլ տվեցին հաղթահարել 2020 թվականին սկսված պատերազմի պատճառով առաջացած մի շարք խնդիրներ։ Ուրախ եմ նաեւ փաստել, որ Արցախի բնակիչների ավելի քան 80 տոկոսը վերադարձել է հայրենիք։ Այնուամենայնիվ, նրանց մի մասը դեռ շարունակում են մնալ Հայաստանում՝ ամենատարբեր հատվածներում եւ նրանք շարունակում են մնալ մեր ուշադրության կենտրոնում»,-ասաց Նարեկ Մկրտչյանը:
Նրա խոսքով, աջակցության ծրագրերից էր 68 հազարական դրամները, որոնք տրվել են 4 ամսվա ընթացքում՝ Արցախի այն բնակավայրերի մեծահասակներին ու անչափահասներին, որոնք պատերազմի արդյունքում հակառակորդի վերահսկողության տակ են անցել, եւ օգնություն այն անձանց, որոնց տներն ու բնակարանները վնասվել են ռմբակոծությունների հետեւանքով, որոնք ֆիզիկական եւ հոգեկան վնասվածքներ են ստացել:
Կարդացեք նաև
«Այս ծրագրերը մենք կշարունակենք իրականացնել նաեւ 2022 թվականի առաջին եռամսյակում»,- ասաց նախարարը՝ նշելով, որ կարիքների գնահատման հիման վրա, Արցախի գործընկերների հետ աշխատելով, նոր ծրագրեր են մշակում:
Նարեկ Մկրտչյանը նաեւ ասաց, որ օրակարգային են բնակարանաշինության հարցերը. «Այն արցախցիները, որոնք գտնվում են Հայաստանում՝ պատրաստ են վերադառնալ Արցախ եւ իրենց կյանքն այնտեղ շարունակել: Եվ ամենակարեւորը հիմա Արցախում բնակարանաշինության հարցն է»:
Ըստ նախարարի, այն արցախցիները, որոնք կոմունալ կացարաններից տեղափոխվում են նոր բնակարաններ, նրանց բնակարանները տրվում են մյուս արցախցիներին: Բացի այդ, ՀՀ կառավարությունը գումար է տրամադրում, որպեսզի Արցախի տեղահանված բնակիչները վճարեն վարձավճարները՝ մինչեւ որ նոր բնակարան կունենան:
Լուսինե ԲՈՒԴԱՂՅԱՆ
