Արցախի շուրջ արվող հայտարարությունները բոլորը պետք է մեկ նպատակի ուղղված լինեն: Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ մեկնաբանելով Ադրբեջանի նախագահ Իլհամ Ալիևի հայտարարությունն այն մասին, որ այսպես կոչված «Զանգեզուրի միջանցքը» պետք է գործի Լաչինի միջանցքի տրամաբանությամբ:
«Չի կարելի ասել, որ մենք չենք արձանագրում խնդիրները: Մենք ոչ միայն դրանք արձանագրում ենք, մենք աշխատում ենք դրանց հետ: Բայց, այնուամենայնիվ, ինձ թվում է, շատ կարևոր է ստեղծել և ձևավորել համապատասխան մթնոլորտ»,- ասել է Զախարովան՝ հավելելով, որ իրենք ամեն ինչ շատ լավ տեսնում են և հասկանում:
Զախարովան նշել է, որ Բրյուսելում Հայաստանի և Ադրբեջանի ղեկավարների հանդիպումը զարգացնում է նոյեմբերի 26-ին ձեռք բերված եռակողմ պայմանավորվածությունները: Նրա խոսքով այդ պայմանավորվածությունների առարկայական քննարկումները շարունակվում են եռակողմ աշխատանքային խմբում՝ երեք երկրների փոխվարչապետերի մակարդակով:
«Այդ մեխանիզմի շրջանակում քննարկվում է Հարավային Կովկասում տրանսպորտային-տնտեսական հանգույցների ապաշրջափակման ողջ համալիրը, այդ թվում ինչպես երկաթուղային, այնպես էլ ավտոճանապարհային հաղորդակցության վերականգնումը տարածաշրջանում»,- ասել է Զախարովան:
Կարդացեք նաև
Նա հավելել է, որ Ռուսաստանի խորհրդատվական աջակցությամբ աշխատանքներ են տարվում Հայաստանի և Ադրբեջանի միջև սահմանազատման հարցերով հանձնաժողովի ստեղծման ուղղությամբ:
Պատրաստեց Վիկտորյա ԱՆԴՐԵԱՍՅԱՆԸ
