Այսօր՝ դեկտեմբերի 24-ին նախատեսված էր Վանաձորի նորընտիր ավագանու անդրանիկ նիստը, սակայն այն տեղի չունեցավ:
Ավագանու 33 անդամներից նիստին ներկայացել էին 16-ը, ինչը նշանակում է, որ նիստն արդեն իրավազոր չէ: Բացի այդ՝ համայնքի աշխատակազմի քարտուղարի ժամանակավոր պաշտոնակատար Դավիթ Հակոբյանը ներկայացրեց վերաքննիչ վարչական դատարանի որոշումը, համաձայն որի՝ «Լուսավոր Հայաստան» կուսակցությունը հայց է ներկայացրել, որի հիման վրա միջանկյալ միջոց էր կիրառվել, եւ արգելվում է Վանաձորի ավագանուն այս ընթացքում ավագանու նիստ հրավիրել համայնքապետ ընտրելու օրակարգով:
«Նորընտիր ավագանու մեր գործընկերներն ունեն պարտավորություն ներկա գտնվելու ավագանու նիստերի դահլիճում: Որովհետեւ այս որոշման մասին մենք բոլորս ծանոթանում ենք այստեղ: Այսինքն, այս որոշումը կայացվել է այսօր, կարծում եմ նախապես որեւիցե մեկը տեղյակ չի եղել այս մասին: Մենք այս պահին ներկա ենք 16 անդամներով, եւ ես կարծում եմ, որ մեր գործընկերներն իրենց պարտավորությունները չեն իրականացրել ՏԻՄ օրենքով վերապահված»,- որոշման մասին ասաց «Մամիկոն Ասլանյան» դաշինքի անդամ Արթուր Օհանյանը:
Կարդացեք նաև
«Հայրենիք» կուսակցության Լոռու մարզային կառույցի ղեկավար, ավագանու անդամ Վահե Դոխոյանն էլ այս որոշմանը տվեց իր գնահատականը. «Ակնհայտ է, որ իշխող ուժն ուղղակի այս որոշումով փորձում է խլել վանաձորցու քվեն: Որին աջակցում է վանաձորցու վստահությունը չշահած «Լուսավոր Հայաստանը»:
Իսկ թե երբ կնշանակվի հաջորդ նիստը, դեռեւս հստակ չէ, կախված է դատարանի որոշումից:
Մանրամասները՝ տեսանյութում
Տաթեւիկ ՂԱԶԱՐՅԱՆ
