ՀՀ ԱԺ «Հայաստան» խմբակցության պատգամավոր, սահմանադրագետ Արամ Վարդեւանյանը առողջապահության նախարարի` աշխատողի հաշվին պարտադիր պատվաստման մասին հրամանը ՍԴ-ում հակասահմանադրական եւ անվավեր ճանաչելու որոշումը հրապարակվելուց հետո ԶԼՄ-ներին ասաց. «Որպեսզի ՍԴ որոշումը ՀՀ աշխատող քաղաքացիների համար ավելի պարզ լինի, այն է, որ աշխատողները իրենց միջոցներով ՊՇՌ հետազոտությունների պարտականություն չունեն, որովհետեւ այն հակասահմանադրական է ճանաչվել: Բայց եկեք մի բանը շարունակենք բոլոր դեպքերում եւ դա ֆիքսենք:
ՀՀ-ում կորոնավիրուսի համավարակի պայմաններում, դրա կանխարգելման լավագույն լուծումը պատվաստումն է: Հենց սա, երբ մենք վիճարկել էինք այս հրամանը, ուզում եմ եւս ֆիքսենք: Բայց գործատուն այլեւս չի կարող աշխատողներին ասել, որ կգնաս եւ քո գրպանից կմուծես ՊՇՌ հետազոտումների համար: Այդ մասով ամեն ինչ ակնհայտ էր ՍԴ որոշման եզրափակիչ մասի հրապարակումից:
Բայց մի բան էլ պիտի խնդրեմ. ՍԴ որոշումները երեք օրյա ժամկետում հրապարակվում են: Եկեք սպասենք այդ երեք օրը եւ նաեւ անդրադարձ կկատարենք այն մյուս հանգամանքներին, որ ՍԴ-ն անդրադարձավ:
Ինչ վերաբերում է պարտադիր պատվաստումներին: Այդ մեխանիզմը ինչպե՞ս էր գործում, մենք ինչի՞ էինք ասում, որ դա փաստացի հարկադրանք է մարդու ազատ կամքի արտահայտման եւ որոշման տեսանկյունից: Որովհետեւ մարդկանց դնում էին երկընտրանքի առաջ. կամ գնա պատվաստվիր անվճար, կամ քո գրպանից գումար կմուծես, որ ՊՇՌ հետազոտման թուղթ բերես: Հիմա այդ գումարը մուծելու պարտականությունը դուրս է գալիս:
Կարդացեք նաև
Բայց կրկին ուզում եմ ասել. սիրելի հայրենակիցներ, հիմա լավագույն լուծումը պատվաստումն է: Բայց դա պետք է լինի ձեր գիտակցված որոշումը: Եվ ես խնդրում եմ, որ ուղղակի խորհրդակցեք բժիշկների, մասնագետների հետ: Իսկ քաղաքական պաշտոնյաներին, որոնք ասում են, թե կորոնավիրուսը ում շունն է, պետք է չլսել»:
Աշոտ ՀԱԿՈԲՅԱՆ
