Aravot.am-ի տեղեկություններով, Կոռնիձոր դպրոցի ուսուցչուհի Կարինե Հ.-ն դեկտեմբերի 22-ին դիմել է ոստիկանություն, որ Տեղ համայնքի ղեկավար Դավիթ Ղուլունցի որոշմամբ՝ Կոռնիձորի վարչական ղեկավար է նշանակվել 57-ամյա Լենտուշ Հակոբջանյանը, որը չունի բարձրագույն կրթություն։
Ըստ հաղորդում ներկայացրած ուսուցչուհու՝ Տեղ համայնքի ղեկավարին նման որոշում կայացնելու համար երաշխավորել է Սյունիքի մարզպետի տեղակալ Կարո Ավանեսյանը (լուսանկարում)։ Նշենք, որ այս պահին Կարո Ավանեսյանը Սյունիքի մարզպետի պաշտոնակատարն է, քանի որ մարզպետ Մելիքսեթ Պողոսյանը արձակուրդում է։ Տեղ համայնքի ղեկավար Դավիթ Ղուլունցն էլ մարզպետի քրոջ որդին է։ Հաղորդման առնչությամբ ոստիկանության Գորիսի բաժնում հանգամանքները պարզվում են, կատարվում է նախաքննություն։
Ըստ «Տեղական ինքնակառավարման մարմինների մասին» ՀՀ օրենքի 31-րդ հոդվածի 8-րդ կետի՝ «1000-ից ավելի հաշվառված բնակիչ ունեցող բնակավայրի վարչական ղեկավարը պետք է ունենա բարձրագույն կրթություն»: Օրենքում այս փոփոխությունը ուժի մեջ է մտել դեկտեմբերից։
Հիշեցնենք, որ այս տարվա սեպտեմբերին էլ Կապանի համայնքի ղեկավար Գեւորգ Փարսյանի դեմ էին նյութեր նախապատրաստվում։ Համայնքապետը բարձրագույն կրթություն ունեցող վարչական ղեկավարներին աշխատանքից ազատել էր եւ նշանակել համապատասխան կրթություն չունեցողներին։
Կարդացեք նաև
Արմեն ԴԱՎԹՅԱՆ
