Ինչպես արդեն տեղեկացրել ենք, Փարաքարում լարված վիճակ է։ Համայնքում իրենց ընտրված են հայտարարել երկու թեկնածուներ, և երկուսն էլ ազդարարել են, որ հինգշաբթի՝ դեկտեմբերի 23-ին, երդմնակալության արարողություն են իրականացնելու։
Հիշեցնենք, որ երկուշաբթի՝ դեկտեմբերի 20-ին, «Ապրելու երկիր» կուսակցությունը հաղորդագրություն է տարածել, որ Փարաքար խոշորացված համայնքում համայնքի ղեկավար է ընտրվել «Ապրելու երկիր» կուսակցության թեկնածու Վոլոդյա Գրիգորյանը։ Սակայն իր ֆեյսբուքյան էջում «Դավիթ Մինասյան» դաշինքի առաջնորդ Դավիթ Մինասյանը հայտնել էր. «Նիստի ընթացքում ստանալով 51%-ից ավելի ձայն՝ (21 ավագանու անդամներից 11 ավագանու անդամ քվեարկեց «Դավիթ Մինասյան» խմբակցության կողմից առաջադրված թեկնածուի օգտին) ես՝ Դավիթ Մինասյանս, ընտրվեցի Փարաքար խոշորացված համայնքի ղեկավար»:
Փարաքարում էր նաև «Ապրելու երկիր» կուսակցության համահիմնադիր Մանե Թանդիլյանը։ Նա լրագրողների հետ զրույցում ասաց, որ եկել է իրավիճակին ծանոթանալու. «Առնվազն բանավոր տեղեկություն ենք ստացել, որը կճշտվի և իրավապահ մարմինների ուշադրության կենտրոնում կհայտնվի, որ Դավիթ Մինասյանը երկու օրով պաշտոնավարում է իրականացրել, եթե չեմ սխալվում, դեկտեմբերի 15-ին և 16-ին։ Այդ ժամանակ էլ կնիքը անհետացել է, ինչ-որ գործողություն է կատարել որպես համայնքապետ, որի իրավունքը ընդհանրապես չի ունեցել»։
Նա նշեց, որ որևէ ոստիկան չի կարող խոչընդոտել Վոլոդյա Գրիգորյանի երդմնակալության արարողությանը. «Դա իրավունքների չարաշահում է, վերազանցում է և իշխանության զավթում։ Այնպես, որ որևէ ոստիկան դա անել չի կարող»։ Նա հավելեց. «Մենք կարձանագրենք ոստիկանության կողմից իշխանության զավթում, որը արդեն շատ լուրջ հոդված է ոստիկանության և ոստիկանապետի համար։ Այնպես, որ հորդորում եմ, որ խոչընդոտ չառաջացնեն, իրենց շահերից է դա բխում»։
Կարդացեք նաև
Մանե Թանդիլյանը հայտնեց, որ տեղեկություն չունի այն մասին, որ «Դավիթ Մինասյան» դաշինքը բողոքարկել է համայնքի ղեկավարի ընտրության արդյունքները. «Մենք պաշտպանելու ենք մեր իրավունքները, և որևէ խնդիր կամ անհանգստություն այդ առումով չունենք»։
Ամի ՉԻՉԱԿՅԱՆ
