Շիրակի մարզպետ Նազելի Բաղդասարյանի դեկտեմբերի 14-ի որոշմամբ Գյումրու «Վ․ Աբաջյանի անվան ընտանեկան բժշկության կենտրոն» ՓԲԸ -ի տնօրեն է նշանակվել Կարեն Թորոսյանը։ Կարեն Թորոսյանը Գյումրու հարգված բժիշկներից մեկի՝ «Շտապօգնություն» ՓԲԸ-ի հանգուցյալ տնօրեն Ռոբերտ Թորոսյանի որդին է։
Ի դեպ, նա ևս մասնակցում էր Գյումրու ՏԻՄ ընտրություններին․ «Քաղաքացիական պայմանագիր» կուսակցության ավագանու թեկնածուների ցանկում էր։
Կարեն Թորոսյանն Aravot.am-ի հետ զրույցում տեղեկացրեց, որ մասնագիտությամբ տնտեսագետ է, մենք նրանից հետաքրքրվեցինք՝ այդ դեպքում ինչպե՞ս պետք է գլխավորի բժշկական հիմնարկը՝ չլինելով բժիշկ։
Կարեն Թորոսյանը տեղեկացրեց, որ որպես կազմակերպիչ-տնտեսագետ՝ 17 տարի աշխատել է բուժհիմնարկներում․ սկզբում աշխատել է տուբդիսպանսերում, այնուհետ նախկին «Կարմիր Խաչի» անվան պոլիկլինիկայում՝ ներկայիս Գրիգոր Նարեկացու անվան պոլիկլինիկայում։
Կարդացեք նաև
Մեր դիտարկմանը, թե բժշկական աշխարհում սովորաբար բուռն քննարկումներ են լինում մասնագիտությամբ ոչ բժշկի նշանակելու շուրջ, մեր զրուցակիցն ասաց․ «Ճիշտ եք, լինում են, բայց կազմակերպչի աշխատանքն ավելի շատ ֆինանսիստ կամ աուդիտ մասնագիտության տեր մարդկանց է պահանջում։ Կառավարության որոշմամբ էլ չի պարտադրվում մասնագիտությամբ բժիշկ լինելը, պահանջվում է բարձրագույն կրթություն, մասնագիտական ստաժ»։
Հիշեցնենք, որ այս պոլիկլինիկան մամուլի ուշադրության կենտրոնում հայտնվեց ԱԱԾ-ի բացահայտումներից հետո առ այն, որ «Քովիդ 19-ի» դեմ պատվաստումներ չեն կատարվել, սակայն բնակիչներին հատկացվել էին պատվաստման վկայականներ։
ԱԱԾ-ի պաշտոնական հաղորդագրության համաձայն․ «Շիրակի մարզպետարանի ենթակայությամբ գործող «Գյումրիի Վ.Աբաջյանի անվան ընտանեկան բժշկության կենտրոն» պոլիկլինիկա ՓԲ ընկերության մի խումբ բուժաշխատակիցներ, շահադիտական շահագրգռվածությունից ելնելով, իրենց պաշտոնեական դիրքը ծառայության շահերին հակառակ են օգտագործել, այն է՝ 2021 թվականի ապրիլ ամսից մինչև օրս ընկած ժամանակահատվածում նույն բժշկական հաստատությունում փաստաթղթերով ձևակերպված և ինչպես Շիրակի մարզում, այնպես էլ Հայաստանի Հանրապետության այլ տարածքներում բնակվող ավելի քան 700 քաղաքացիների փաստացի չեն պատվաստել սահմանված դեղատեսակներով և դեղաչափերով, փոխարենը` կազմել և հաստատել են կորոնավիրուսային հիվանդության (COVID-19) դեմ ամբողջական պատվաստված լինելը հավաստող, իրականությանը չհամապատասխանող փաստաթղթեր՝ սերտիֆիկատներ, որոնք մուտքագրել են էլեկտրոնային առողջապահության միասնական տեղեկատվական «ԱՐՄԵԴ» համակարգ»:
Ձերբակալվել էին նույն բժշկական հաստատության թվով վեց աշխատակիցներ, որոնք, ըստ քրեական գործի նախաքննության, յուրաքանչյուր քաղաքացուց ստացել են 5.000-10.000-ական ՀՀ դրամի չափով կաշառք, իսկ պատվաստանյութերը ոչնչացվել են:
Ավելի ուշ ձերբակալել էին նաև տնօրենին, դատարանը, սակայն, մերժել էր նրան նկատմամբ՝ որպես խափանման միջոց կալանավորելը՝ հաշվի առնելով առողջական վիճակն ու տարիքը։
Շիրակի մարզի դատախազ Գուրգեն Գրիգորյանն ասաց, որ դատախազությունը վերաքննիչ բողոք է ներկայացրել։
Նունե ԱՐԵՎՇԱՏՅԱՆ
Լուսանկարը՝ Կարեն Թորոսյանի ֆեյսբուքյան էջից
