Ermenihaber. Արցախյան 44-օրյա պատերազմից հետո աստիճանաբար ավելանում է ադրբեջանական շուկա մտնող թուրքական խոշոր ընկերությունների թիվը:
Սկզբում ադրբեջանական շուկա մտան թուրքական այնպիսի խոշորագույն շինարարական կազմակերպություններ, ինչպիսիք են «Kolin», «Kalyon», «Cengiz», «Tekfen» ընկերությունները: Նրանց մուտքը Արցախի՝ Ադրբեջանի տիրապետության տակ անցած հատվածներում Բաքվի նախաձեռնած մեծածավալ շինարարական աշխատանքներին մասնակցելու նպատակով էր։
Հիմա էլ Թուրքիայի նախագահ Ռեջեփ Էրդողանի հետ մտերիմ կապերով հայտնի «Demirören Holding» ընկերությունն է պատրաստվում 40 մլն դոլարանոց ներդրում անել Ադրբեջանում։
Ի դեպ, «Demirören Holding»-ը 2016-ի հեղաշրջման փորձից հետո թուրքական իշխանությունների խնդրանքով գնել էր երկրի ամենամեծ մեդիահոլդինգներից մեկը՝ այն դնելով իշխանությունների վերահսկողության տակ:
«Demirören Holding»-ը նախ իր կազմի մեջ է ներառել Ադրբեջանի պետական «Azerlotereya» ընկերությունը, ապա պատրաստվում է Ադրբեջանի պետական ներդրումային կազմակերպության հետ միասին 40 մլն դոլարանոց ներդրում անել դեղագործության ոլորտում: Հաղորդվում է, որ այդ նպատակով Ադրբեջանի կառավարությունն արդեն թուրքական հոլդինգին տեղ է հատկացրել Կասպից ծովի Փիրալլահի կղզում: Ստեղծվող դեղագործական կազմակերպությունում կբացվի 50 աշխատատեղ: Այն կաջակցի նաև տեղի համալսարանների նույն ոլորտի հետազոտական ծրագրերին:
Նշվում է նաև, որ Կասպից ծովի ամենամեծ կղզում 1-ին դեղագործական գործարանը 2019-ին հիմնել են ռուսները՝ նույնպես Ադրբեջանի ներդրումների պետական ֆոնդի հետ համատեղ: Այս ներդրումը կազմել էր 74 մլն դոլար:
