«Եթե Ալիեւն այդքան մտահոգ է, հումանիստ է, մտածում է՝ գերիներին մենք վերադարձրել ենք, ինքը մտածում է ապագայի մասին, թե ինչ կլինի, մենք մեր գերիներին որ վերադառնում են, արդեն գիտենք՝ ինչպես վարվենք: Քննություն է գնում, թե ինչ պայմաններում են իրենք գերեվարվել: Այդ պայմաններից ելնելով՝ արդեն գիտենք՝ ինչ պիտի անենք, ոնց ենք վերաբերվելու: Իսկ Ալիեւը, որ դառել է այդքան հումանիստ հա, մեր գերիների մասին մտածում է, ուրեմն իրենք չպիտի մեր գերիներին խոշտանգեն, որը իրենք կատարում են սրբորեն՝ արդեն մոտ 26-30 տարի»,- այսօր ԱԺ-ում լրագրողների հետ զրույցում ասաց ՔՊ խմբակցության պատգամավոր, ԱԺ պաշտպանության եւ անվտանգության հարցերի հանձնաժողովի անդամ Գագիկ Մելքոնյանը:
Նա հայտարարեց. «Եթե մարդը գերեվարվել է, ինքը պիտի գա եւ ասի՝ ի՞նչ ձեւով գերեվարվեց, որպեսզի գերի ընկնելը մեր մոտ չդառնա խասիաթ: Թուրքը 200 մետրից գալիս է, մենք ձեռները բարձրացնում ենք, հանձնվում ենք: Ամեն ինչ իր կարգն ունի: Գերի՞ է ընկել՝ հասկացանք, հիմա ամեն ինչ էլ պատահում է մարդու հետ: Եկել է, բա չասի՞ իր հրամանատարը դավաճան է»:
Զարմանքին՝ այսինքն, զինվորնե՞րն են մեղավոր՝ Գագիկ Մելքոնյանը պատասխանեց. «Ես զինվորի մասին չեմ խոսում, ես խոսում եմ՝ գերի հանձնված զինվորները կարան գան ասեն՝ իրենց հրամանատարի պատճառով է գերեվարվել, ինչ-որ մի բանի պատճառով է գերեվարվել»:
Դիտարկմանը, որ չկրակելու հրաման է եղել՝ Գագիկ Մելքոնյանը պատասխանեց. «Ապրիս, բա մենք հիմա չիմանա՞նք՝ ով է հրաման տվել, որ չկրակեն»:
Կարդացեք նաև
Լրագրողների հարցին՝ պարտադիր պետք է կալանավորվեի՞ն վերադառնալուց հետո՝ Մելքոնյանը պատասխանեց. «Մի րոպե, լսի մի դառեք դուք մի հատ մե՜ծ պաշտպան ու հերոս ու մնացածը… Բա գնացել էր՝ քեզ էր պաշտպանում այդ տղեն, քեզ պիտի պաշտպաներ, ոչ թե գերի ընկներ, որ գային ձեզ էլ բռնաբարեին»:
Երբ ասացին՝ ոնց պտտվում եք, էլի զինվորն է մեղավոր՝ Գագիկ Մելքոնյանն արձագանքեց. «Դու հայերեն երեւի լավ չես հասկանում, նորից եմ կրկնում՝ չհասկացողների համար: Զինվորը գերեվարվել է, պիտի գա հայրենիք, իրեն հարցնեն՝ ինչո՞ւ գերեվարվեցիր: Այդ մարդը պատասխանում է՝ իմ հրամանատարն է մեղավոր, կամ իմ գիտակցությունը կորցրել եմ, ինչ-որ մի բան, որ մենք հասկանանք, ժողովուրդը հասկանա»:
Հարցին՝ երկու ադրբեջանցի գերի էինք վերցրել, ինչո՞ւ այդքան արագ հանձնեցինք Ադրբեջանին, չփոխանակեցինք՝ Գագիկ Մելքոնյանը պատասխանեց. «10 հոգի եկել են այստեղ, սրա փոխարեն երկու հոգի գնացել է, հավասա՞ր են պայմանները: Այդ նույն կառույցները ասում են՝ դուք էլ տվեք գերիներին»:
Մանրամասները՝ տեսանյութում:
Հռիփսիմե ՋԵԲԵՋՅԱՆ
