Այսօր Երեւանի ավագանու հերթական նիստին քվորում չկար։ «Իմ քայլը» խմբակցությունը չէր մասնակցում նիստին, խմբակցությունը երեկ հայտարարել էր, որ չի մասնակցելու։
«Հաշվի առնելով Երևանի ավագանու եւ Երեւանի քաղաքապետի միջեւ առկա քաղաքական ճգնաժամը՝ Երևանի ավագանու «Իմ քայլը» խմբակցությունը չի մասնակցի դեկտեմբերի 21-ի ժամը 11:00-ին կայանալիք ավագանու հերթական նիստին: Միևնույն ժամանակ հաշվի առնելով, որ նիստի օրակարգում ընդգրկված են այնպիսի կարևոր հարցեր ինչպիսիք են՝ Երևան քաղաքի 2022 թվականի բյուջեի, զարգացման ծրագրի և մի շարք այլ կարևոր նախագծեր, այդ կապակցությամբ ցանկանում ենք տեղեկացնել, որ դեկտեմբերի 22-ին նոր քաղաքապետի ընտրությունից հետո, մինչև տարեվերջ, կհրավիրվի ավագանու արտահերթ նիստ, որտեղ կքննարկվեն և կընդունվեն վերոնշյալ նախագծերը»,-հայտարարել է «Իմ քայլը» խմբակցությունը։
Երեւանի քաղաքապետ Հայկ Մարությանը 30 րոպե ընդմիջում հայտարարեց։
Կարդացեք նաև
Մինչ ընդմիջմանն անցնելը՝ քաղաքապետը երեւանցիներին, իր խոսքով՝ մի ուրախալի լուր հայտնեց․ «Այսօր եւս հայտարարվել է 280 վերելակի մրցույթ։ 2021 թվականին մենք տեղադրել ենք 54 վերելակ, որը հատուկ նախատեսված էր 44-օրյա պատերազմում հաշմանդամություն ստացած զինվորների համար։ 46 վերելակի մրցույթն այս պահին ընթացքում է։ Ընդհանուր առմամբ 2022 թվականին Երեւանում կունենանք լրիվ նոր, փոփոխված 1000 վերելակ»։
Նիստը կշարունակվի, եթե քվորում լինի։
Դեկտեմբերի 15-ին հայտնի դարձավ, որ Երեւանի ավագանու «Իմ քայլը» խմբակցությունը նախաձեռնել է քաղաքապետ Հայկ Մարությանին անվստահություն հայտնելու գործընթաց, ինչի համար հավաքել է ավագանու 1/2 -ից ավելիի ստորագրությունը։
Ավելի վաղ վարչապետ Նիկոլ Փաշինյանի ընտանիքին պատկանող «Հայկական Ժամանակ»-ը գրել էր, թե Մարությանը հանդիպել է ՀՀ 2-րդ նախագահ Ռոբերտ Քոչարյանի հետ։ Այս տեղեկությունը Մարությանի խոսնակ Հակոբ Կարապետյանը հերքել էր, նշելով՝ Հայկ Մարությանը Ռոբերտ Քոչարյանի հետ որեւէ կերպ չի առնչվել, նրա հետ երբեք չի հանդիպել։
Նելլի ԲԱԲԱՅԱՆ
