Հիմնական կազմի անդամների մեծ մասի բացակայությամբ՝ Հայաստանի բռնցքամարտի հավաքականը հաղթող ճանաչվեց առաջին անգամ չորս երկրների՝ Հայաստանի, Իրանի, Վրաստանի եւ Ուկրաինայի մասնակցությամբ Երեւանում կազմակերպված թիմային մրցաշարում:
Մեր տղաները առավելության հասան բոլոր մրցակիցների նկատմամբ:
Մրցաշարի ավարտին Aravot.am-ը ՀԲՖ նախագահ Հովհաննես Հովսեփյանից հետաքրքրվեց, թե արդարացա՞ն արդյոք սպասելիքները եւ հնարավո՞ր է, որ այս ձեւաչափով մրցաշարը դառնա ավանդական:
«Մրցաշարը դրական ազդեցություն կունենա մեր բռնցքամարտիկների վրա: Այս ձեւաչափը արդարացնում է իրեն, քանի որ տղաներին թույլ է տալիս լրացնել փորձի պակասը: Հետագայի համար մարզիչների հետ դեռ կխորհրդակցենք, կիմանանք նրանց կարծիքը: Վստահ եմ, որ կլինեն նոր առաջարկներ: Բայց որ Հայաստանի Հանրապետությունում միջազգային մրցումներ ավելի շատ պետք է կազմակերպվեն, միանշանակ է: Եվ ես այդ մասին միշտ ասել եմ»,-պատասխանեց նա:
Կարդացեք նաև
ՀԲՖ նախագահը նաեւ մրցավարներին վերաբերող փակագծեր բացեց: «Հիմա անուններ չեմ հնչեցնի, սակայն այս մրցաշարում աշխատած մեր երկու մրցավարների առաջարկելու եմ նախապատրաստվել եւ որակավորումը բարձրացնելու համար հանձնել միջազգային կարգի առաջին աստղի քննություններ»,- ասաց Հովհաննես Հովսեփյանը:
Աշոտ ՀԱԿՈԲՅԱՆ
