Դեկտեմբերի 18-ին «Դարան» գրախանութում կայացավ Հովիկ Աֆյանի «Քաղցր կյանք» գրքի շնորհանդեսը։ Ժամանակակից գրողը TCK Publishing-ի միջազգային մրցույթում «Լավագույն գեղարվեստական գիրք» անվանակարգի հաղթողն է։
Հեղինակի խոսքով՝ «Քաղցր կյանքը» շատ բարդ պատմություն ունեցող գիրք է։ Դառը պատմություն է՝ քաղցր կյանքի մասին։ Հովիկ Աֆյանի առաջին վեպը «Կարմիր»-ն է, որը պատերազմի և մարդկանց մասին է, որոնց կռիվը երբեք չի ավարտվում։ Դրանից առաջ պատմվածքներ էր գրել։ «Քաղցր կյանքը» վեպը հեղինակը սկսել էր գրել «Կարմիր»-ից առաջ։ Սակայն գրողական խնդիրների պատճառով գիրքը կիսատ էր մնացել։ Վերնագիրը դրել էր, հետո սկսել գրել պատմությունը, բայց չէր ստացվել։
Աֆյանն ասում է՝ մի շնչով գրեց «Կարմիր» վեպը, իսկ «Կարմիր»-ից հետո վերադարձավ «Քաղցր կյանք»-ին։
«Թեման իսկապես ինձ շատ վաղուց և լրջորեն անհանգստացնում է»,- ասում է հեղինակը։
Կարդացեք նաև
Իրադարձությունները ծավալվում են մի քաղաքում, որտեղ մարդիկ հանկարծ պարզում են, որ գերեզմանները ավելի շատ են, քան տները։ Առաջանում է հարց, թե ինչ կարող են անել մարդիկ, որոնք փորձում են գտնել կամ ստեղծել դրախտը։
Այդ մարդկանց պատմությունն է՝ բաժանված չորս գլխի՝ խորհրդանշական անուններով՝ հող, ջուր կրակ և օդ։
«Այդ չորս տարերքների միջավայրում մարդիկ փորձում են դրախտ ստեղծել՝ առանց հասկանալու, որ դրախտն իրականում պահ է, որը յուրաքանչյուրս ամեն օր ապրում ենք»,- ասում է Հ․ Աֆյանը։
Ժանրային առումով երկու վեպերը իրար նման չեն։ Հեղինակը ասում է, որ անգամ լսել է՝ երկու վեպը ընթերցողը ասել է՝ գրողը նույնը չէ։
«Կարմիր» գիրքը ընթերցելուց հետո մեծ սպասումներ ունեմ նաև այս նոր գրքից։ Ընդհանուր գրքերի թեմաները շատ արդիական են»,- ասում է շնորհանդեսին ներկա Աննա Հովհաննիսյանը։
Լիանա ԽԱՉԱՏՈՒՐՅԱՆ
