«Չեմ հասցրել հետեւել, մանրամասների հետ կապված բան չեմ կարող ասել, բայց մի բան պարզ է՝ ԱԺ աշխատակազմում կա լրագրողների հավատարմագրման ընթացակարգ եւ ընթացակարգեր, որոնք լրագրողների մասնագիտական գործունեության երաշխավորման համար ընդհանուր կանոններ են սահմանում»,-խորհրդարանում լրագրողների հետ ճեպազրույցում այսօր անդրադառնալով ԱԺ նախագահ Ալեն Սիմոնյանի վարքագծին, երբ վերջինս օպերատորների՝ իրեն տեսնելուն պես ոտքի չկանգնելու համար հրահանգել է միջանցքից հավաքել աթոռները՝ ասաց «Քաղաքացիական պայմանագրի» կողմից որպես ՀՀ ՄԻՊ առաջադրված թեկնածու Քրիստինե Գրիգորյանը։
Նա նշեց․ «Այս տեսանկյունից բոլորս երկուստեք պետք է․․․սա երկկողմանի ճանապարհ է։ Հնարավոր չէ, որ մի կողմը միշտ լինի գործակցություն առաջարկողի դերում։ Այս առումով կարծում եմ՝ պետք է գտնել երկխոսության հնարավոր ձեւը, որովհետեւ լրագրողները կարեւոր առաքելություն են իրականացնում, իսկ քաղաքական գործիչները կարեւոր հանրային դեմքեր են։ Շահը համընկնող է»։
Լրագրողները հետաքրքրվեցին՝ ի՞նչ երկխոսելու մասին է խոսքը, երբ օպերատորները զրկվել են աթոռներից, ո՞ր օրենքով է սահմանված, որ ԶԼՄ ներկայացուցիչները պետք է ոտքի կանգնեն պաշտոնյաների առաջ։ «Կարծում եմ՝ արդեն ասացի, որ մանրամասներին տեղյակ չեմ։ Առաջին անգամ եմ լսում, եւ չեմ կարող ողջամիտ մեկնաբանություն տալ»,-ասաց Քրիստինե Գրիգորյանը։
Լուիզա ՍՈՒՔԻԱՍՅԱՆ
