Դեկտեմբերի 15-ին ՀՀ ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանն ընդունել է Հայաստանի Հանրապետությունում Էստոնիայի Հանրապետության արտակարգ եւ լիազոր դեսպան Ռինա Կալյուրանդին (նստավայրը` Թբիլիսի): Հանդիպմանը մասնակցել է Հայաստան-Էստոնիա բարեկամական խմբի ղեկավար Անուշ Բեղլոյանը, ինչպես նաեւ դեսպանորդ Փեեթեր Փալսը:
Ողջունելով դեսպանին` Էդուարդ Աղաջանյանը նշել է, որ երկու երկրների միջեւ առկա են ջերմ ու բարեկամական հարաբերություններ, որոնց ընդլայնման առումով կարեւոր են միջխորհրդարանական հարաբերությունները, մասնավորապես խորհրդարանական բարեկամության խմբերի սերտ աշխատանքը:
Որպես Հայաստան-Էստոնիա բարեկամական խմբի ղեկավար` Անուշ Բեղլոյանը կարեւորել է օրենսդիրների միջեւ շփումների ակտիվացման եւ առաջիկայում աշխատանքային օրակարգի ձեւավորման հարցերը:
Հանձնաժողովի նախագահը ներկայացրել է հետպատերազմյան իրավիճակը, տարածաշրջանում առկա մարտահրավերները: Էդուարդ Աղաջանյանն անդրադարձել է Ադրբեջանի կողմից իրականացվող սադրանքներին եւ եռակողմ հայտարարությամբ ամրագրված դրույթների խախտումներին:
Կարդացեք նաև
Հայ խորհրդարանականները նշել են, որ օրակարգային կարեւորագույն հարցը շարունակում է մնալ հայ ռազմագերիների եւ գերեվարված անձանց վերադարձը հայրենիք: Այս համատեքստում Էդուարդ Աղաջանյանն արժեւորել է Էստոնիայի խորհրդարանի Հայաստանի հետ բարեկամական խմբի` ռազմագերիների վերադարձի հարցում հստակ դիրքորոշումը:
Խոսելով ՀՀ-ԵՄ համագործակցությունից` Հայաստան-Էստոնիա բարեկամական խմբի ղեկավար Անուշ Բեղլոյանը կարեւորել է Էստոնիայի աջակցությունը` Համապարփակ եւ ընդլայնված գործընկերության համաձայնագրի արդյունավետ եւ լիարժեք կիրարկման հարցում:
Դեսպանն ընդգծել է միջխորհրդարանական կապերի խորացման, փոխայցերի ակտիվացման, ինչպես նաեւ մի շարք ոլորտներում փոխգործակցության զարգացման անհրաժեշտությունը:
Կողմերն անդրադարձել են անվտանգային հարցերի կարեւորությանը եւ տարածաշրջանում երկարաժամկետ խաղաղության հաստատման հարցերին:
Զրուցակիցները քննարկել են նաեւ հայ-էստոնական համագործակցությունն ընդլայնելու հնարավորությունները, մասնավորապես համագործակցությունը եւ գալիք աշխատանքները մի շարք կառույցների ու կազմակերպությունների շրջանակներում:
ՀՀ Ազգային ժողով
