«ԵՄ ներկայությունը գործընթացում որոշ չափով մեծացավ»,- «Հոդված 3» ակումբում անդրադառնալով բրյուսելյան բանակցություններին՝ ասաց ռազմաքաղաքական հարցերով փորձագետ Արեգ Քոչինյանը։
Հիշեցնենք, Բելգիայի մայրաքաղաք Բրյուսելում դեկտեմբերի 14-ին Եվրոպական խորհրդի նախագահ Շարլ Միշելը հանդիպել է Հայաստանի և Ադրբեջանի ղեկավարների հետ առանձին, ինչից հետո տեղի է ունեցել եռակողմ հանդիպում։
Նրա կարծիքով՝ հանդիպումը այս ընթացքում ձևավորված եռակողմ տրամաբանությունը չփոխեց. «ԵՄ դերակատարությունը որոշ չափով ակտիվացավ, բայց բովանդակային առումով բրյուսելյան հանդիպումը եռակողմ ձևաչափում ոչ մի փոփոխություն չի կատարել»։
Անդրադառնալով Ադրբեջանի նախագահ Իլհամ Ալիևի հայտարարությանը, թե «Զանգեզուրի միջանցքը» պետք է գործի Լաչինի միջանցքի տրամաբանությամբ. եթե Երևանը մաքսակետեր տեղադրի «Զանգեզուրի միջանցքում», Բաքուն նույնպիսի պայմաններ կպարտադրի Լաչինի միջանցքում, Արեգ Քոչինյանը ասաց. «Եթե Ադրբեջանը համարում է, որ դրանք հավասարազոր ճանապարհներ են, կամ դրանք պետք է նույն տրամաբանության մեջ դիտարկել, ապա ինչո՞ւ նոյեմբերի 9-ին այդ նույն միջանցք բառը գրված չի եղել Զանգեզուրի ճանապարհի վերաբերյալ։ Այսինքն՝ սա ևս շատ կարևոր փաստարկ է, որ կա հստակ տարբերություն այդ երկու ճանապարհների միջև։ Եվ այդ երկու ճանապարհները՝ Լաչինի միջանցքը և այն ճանապարհը, որը Ադրբեջանը պահանջում է Զանգեզուրում՝ իրավական առումով լրիվ տարբեր կարգավիճակներ պետք է ունենան։ Եվ ըստ էության, բոլորովին վերջերս Ադրբեջանը սրա տակ ստորագրել է։ Այսինքն՝ հիմա Ադրբեջանը փորձում է խմբագրման ենթարկել բոլորովին վերջերս իր ստանձնած պարտավորվածությունները»։
Կարդացեք նաև
Ամի ՉԻՉԱԿՅԱՆ
