Ադրբեջանի նախագահ Իլհամ Ալիևը իսպանական El Pais պարբերականի հետ զրույցում հայտարարել է, որ իրենք հաղթել են պատերազմում, և վերադարձ չի լինելու այնպիսի թեմաների, ինչպիսին է, օրինակ, Արցախի կարգավիճակը:
«Ադրբեջանի դիրքորոշումը բաց ու հստակ է: Մենք խաղաղություն ենք ուզում, մենք պատերազմ չենք ուզում: Մենք հաղթել ենք պատերազմում, հաղթանակ ենք տարել, և այդ իրողության հետ պետք է հաշվի նստել: Լեռնային Ղարաբաղի հակամարտությունն ավարտված է, չկա վերադարձ որևէ այնպիսի քննարկման, ինչպիսին է Ղարաբաղի կարգավիճակը կամ նման մի բան»,- ասել է Ալիևը:
Ալիևը նշել է, որ այս պահին Ղարաբաղում, որտեղ «ժամանակավորապես տեղակայված են ռուս խաղաղապահներ», իրավիճակը ավելի կայուն է, քան հայ-ադրբեջանական սահմանին: «Ցավոք, Հայաստանը չի հրաժարվել ռևանշի փորձերից: Նրանց համար Ղարաբաղյան երկրորդ պատերազմում պարտությունը շատ ցավոտ էր»,- ասել է նա:
Ալիևը հերթական անգամ նշել է, որ Հայաստանը պետք է զերծ մնա «թշնամական գործողություններից և տարածքային հավակնություններից» և աշխատի հաշտության պայմանագրի վրա: «Մենք հարևաններ ենք, և մեզնից ոչ մեկ չի կարող այլ մոլորակ թռչել: Մենք պետք է սովորենք ապրել կողք-կողքի և աստիճանաբար հող նախապատրասենք հարաբերությունների կարգավորման համար, այդ թվում շփումներ մարդկանց միջև: Մենք բաց հայտարարել ենք, որ պատրաստ ենք դրան: Բայց առայժմ դրական ազդակներ չենք ստացել»,- ասել է Ալիևը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
