Այսօր Հայաստանը գտնվում է թուրք-ադրբեջանական աննախադեպ ճնշումների ներքո եւ այդ զիջողական խաղաղության օրակարգը մեզ պարտադրվում է: Այսօր «Հայելի» ակումբում անդրադառնալով Թուրքիայի արտգործնախարար Մեւլութ Չավուշօղլուի երեկվա հայտարարությանը՝ փոխադարձաբար ներկայացուցիչներ նշանակելու, Երեւան-Ստամբուլ չարթերային թռիչքներ իրականացնելու վերաբերյալ, ասաց տնտեսագետ, «Հայաստան» խմբակցության պատգամավոր Թադեւոս Ավետիսյանը: Նրա համոզմամբ, այդ հանգամանքն ավելի շատ մոտեցնում է պատերազմի, քան խաղաղության. «Որովհետեւ, տարածաշրջանում չի կարող լինել խաղաղություն, եթե մեկ կողմի շահերը բոլորովին անտեսվում են, իսկ օրակարգը թելադրվում է ստիպողաբար եւ տարածաշրջանի մյուս երկրների ամբողջական շահերն առաջ մղելով: Այսպիսի իրավիճակը կամ կբերի մեր պետականության կորստի, կամ, ավելի արագ կմոտեցնի նոր պատերազմի՝ իր բոլոր հետեւանքներով»:
Պարոն Ավետիսյանի խոսքով, իշխանությունները «մանիպուլյացիա» են անում՝ տարածաշրջանային տնտեսական ինտեգրումները հակադրում են այն իրողություններին, որոնք այսօր ունենք. «Տարածաշրջանային ինտեգրացիան շատ կարեւոր է, տնտեսությունները տարածաշրջանում փոխադարձ կապերը զարգացնելով կարող են ունենալ տնտեսական լրացուցիչ արդյունքներ, բայց դա չի վերաբերում այսօրվան եւ մեր տարածաշրջանին, քանի որ, դեռեւս լուծված չեն բազմաթիվ աշխարհաքաղաքական հարցեր մեր տարածաշրջանում»:
Նրա խոսքով, այսօր Արցախի հանրապետությունը գտնվում է ծանր իրավիճակում, Հայաստանի ինքնիշխան տարածքում գտնվում են ադրբեջանական զինվորները եւ, բացի այդ, լուծված չէ Արցախի կարգավիճակի հարցը. «Եվ, այդ անորոշությունների ֆոնին գումարվում է նաեւ Հայաստանի տնտեսական հյուծումը: Այս իրավիճակում նման օրակարգը, փաթեթավորված որպես տարածաշրջանային խաղաղություն, իշխանությունները հրամցնում են, որպես միակ այլընտրանքը»:
Թադեւոս Ավետիսյանը հիշեցրեց Ադրբեջանի եւ Թուրքիայի՝ նրա խոսքով ասած՝ «լկտի պահվածքը», որոնք Գորիս-Կապան ճանապարհներին, այսինքն՝ մեր երկրի տարածքում ադրբեջանական մաքսակետեր են տեղադրել եւ հարկում են մեր քաղաքացիներին ու գումարը լցնում Ադրբեջանի բյուջե:
Կարդացեք նաև
«Տնտեսական անվտանգային խնդիրները կարեւոր են: Իսկ ո՞վ է ասել, որ այն ճանապարհը իրենք մի օր ընդհանրապես չեն փակի եւ կամայական գործողություններ չեն անի: Այդ ճանապարհը մեզ համար ունի կենսական նշանակություն, իրենց համար որեւէ տնտեսական նշանակություն այդ ճանապարհն այս պահին չունի: Բայց դա միջանցքային տրամաբանության մի մասն է: Առանց սահմանազատման եւ սահմանագծման տիրացան մեր ճանապարհահատվածի մի մասին, իսկ հարավային այդ հատվածը մեր տնտեսության հիմնական զարկերակն է»:
Լուսինե ԲՈՒԴԱՂՅԱՆ
