ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար Գեղամ Շախբազյանի հանձնարարականով՝ Տեսչական մարմնի Գեղարքունիքի տարածքային բաժինը 2021թ. ստուգումներ է իրականացրել ՀՀ Գեղարքունիքի մարզի Ճամբարակ համայնքի Թթուջուր բնակավայրի մանկապարտեզներից մեկի շենքի նորոգման և բարեկարգման ընթացքում քաղաքաշինության բնագավառում իրավական ակտերի պահանջների կատարման և պահպանման նկատմամբ։
Շինարարական աշխատանքների թույլտվությունը տրվել է Ճամբարակ համայնքի ղեկավար Վազգեն Ադամյանի կողմից։
ՀՀ ՔՏՀԱ տեսչական մարմնի Գեղարքունիքի տարածքային բաժնի կողմից կատարված ստուգումների արդյունքում հայտնաբերվել է, որ շինարարական աշխատանքներն իրականացվել են համաձայնեցված նախագծին ոչ համապատասխան։
Խախտումներ են թույլ տվել թե՛ շինարարություն իրականացնող «Էկոմիքս», թե՛ հեղինակային հսկողություն իրականացնող «Վանարխ» ՍՊԸ-ները, թե՛ տեխնիկական հսկողություն իրականացնող «Մկրտիչ Մելքոնյա Սուրենի» ԱՁ-ն։
Մասնավորապես, հայտնաբերվել են սահմանված կարգի հետևյալ խախտումները՝
-մանկապարտեզի պատշգամբների վրա կառուցված են մետաղական ծածկարաններ, որոնք նախագծով նախատեսված չեն եղել,
– մանկապարտեզի տարածքի բետոնյա գունավոր սալիկներով ճեմուղիները կառուցված են, (ընդ որում՝ աշխատանքն անորակ է, կան անհարթություններ, սալիկները շարժվում են), սակայն բացակայում է բետոնե անձրևատարը,
-մանկապարտեզի 2-րդ հարկի տարհանման դռները տեղադրված են նախագծին ոչ համապատասխան՝ բացվում են շարժման ուղղությամբ դեպի ներս,
-ըստ նախագծի՝ նախատեսված էր պատշգամբների հատակը երեսպատել բազալտե ուղղանկյունաձև սալիկներով, սակայն երեսպատվել է սալիկների մնացորդներով, անհարթություններով և կամայական շարվածքով,
-բացակայում է տանիք բարձրացող մտոցը,
– մանկապարտեզի 2-րդ հարկի պատշգամբներից բակ իջնող մետաղական աստիճանավանդակները կառուցված են նախագծին ոչ համապատասխան․ նախագծով նախատեսված անկյունաձևի փոխարեն ուղիղ են կառուցվել։
Կարդացեք նաև
Խախտումներ թույլ տված ընկերությունների նկատմամբ կազմվել են վարչական իրավախախտումների վերաբերյալ ակտեր։
Այսպիսով՝ Վարչական իրավախախտումների վերաբերյալ ՀՀ օրենսգրքի 1578-րդ հոդվածի համաձայն շինարարություն իրականացնող «Էկոմիքս» ՍՊԸ ենթարկվել է վարչական պատասխանատվության։ Վարչական պատասխանատվության են ենթարկվել նաև հեղինակային և տեխնիկական հսկողություն իրականացնող ընկերությունները։
Խախտման վերացման վերաբերյալ «Էկոմիքս» ՍՊԸ-ի տնօրենին տրվել է պարտադիր կատարման ենթակա ցուցում։
ՀՀ քաղաքաշինության, տեխնիկական և հրդեհային անվտանգության տեսչական մարմին
