«ԱԺ նախագահի հարցում իշխանությունը, բնականաբար, միասնական է։ Որքան էլ ընդդիմությունը փորձի էժան քաղաքական դիվիդենտների հետեւից ընկնել ու տարատեսակ անպատեհ, անհեռանկար նախագծեր բերել, իշխանության դիրքորոշումը դրանից չի փոխվելու»,-խորհրդարանում լրագրողների հետ ճեպազրույցում այսօր անդրադառնալով «Հայաստան» դաշինքի հեղինակած՝ ԱԺ նախագահ Ալեն Սիմոնյանի պաշտոնանկության նախագծին, որում որպես հիմնավորումներ են բերված Ալեն Սիմոնյանի կողմից գերիների մասին հայտարարությունները, կողմնակալ վերաբերմունքը պատգամավորների հանդեպ՝ ասաց «Քաղաքացիական պայմանագրի» պատգամավոր Վահագն Ալեքսանյանը։
«Կարծում եմ՝ շատ ավելի կարեւոր հարցեր ունենք քննարկելու, որոնք անընդհատ դոփում են տեղում այն պատճառով, որ ընդդիմությունն անհասկանալի գործողություններով, շոուներ բեմադրելով է զբաղված։ Այս նախագիծն էլ շոուների շարքից է»,-իր հերթին կարծիք հայտնեց ՔՊ-ական Արուսյակ Ջուլհակյանը եւ շարունակեց,-«անձամբ ես չեմ պատրաստվում կողմ քվեարկել այդ նախագիծն օրակարգ բերելուն։ Ինչ վերաբերում է իրենց հիմնավորումներին, թե ինչ հայտարարություններ է անում Ալեն Սիմոնյանը, ապա արձանագրենք, որ «Հայաստան» դաշինքի համար գերիների հարցը բացառապես ներքաղաքական շահարկումների հարց է։ Իմ խոսքն ապացուցվում է նրանով, որ դաշինքը հրաժարվել է միջազգային պատվիրակություններում իր մասնակցությունից, ՀՀ շահը ներկայացնելուց»։
Կարդացեք նաև
Լուիզա ՍՈՒՔԻԱՍՅԱՆ
