Aravot.am-ի տեղեկություններով, քաղաքացի Գայանե Մուրադյանը դեկտեմբերի 7-ին ոստիկանություն հաղորդում է տվել, որ դեկտեմբերի 4-ի երեկոյան իրենց տուն են եկել Վարդենիս քաղաքի խոշորացված համայնքի ղեկավարի թեկնածու Ահարոն Խաչատրյանի կինը՝ է․ Խ․-ն եւ քրոջ դուստրը՝ Ա․ Գ-ն, իբր իր զինվոր որդուն տեսակցելու նպատակով։ Է․Խ․-ն, գրպանից հանելով 3 հատ քսան հազար թղթադրամ, դրել է սեղանին։
Թեկնածուի կինը Գայանե Մուրադյանին ասել է, որ նշված գումարը չհասկանան որպես ընտրակաշառք, գումարը իր զինվոր որդու համար է։ Գայանե Մուրադյանը հասկանալով, որ դա ընտրակաշառք է, որպեսզի դեկտեմբերի 5-ին կայանալիք ՏԻՄ ընտրություններին իրենք ընտանիքով քվեարկեն «Ահարոն Խաչատրյան» դաշինքի օգտին՝ նշված 60 հազար դրամը վերադարձրել է նրանց եւ իր տնից դուրս հրավիրել:
Հանգամանքները պարզվում են, նախապատրաստվում են նյութեր:
Ի դեպ, «Հրապարակ» օրաթերթում այս փաստի մասին հետեւյալ մեկնաբանությունը կա, թե Ահարոն Խաչատրյանի տան բանվորի մորը ցուցմունք են գրել տվել: Բանվորը զինծառայող է, որն առողջական խնդիր է ունեցել: «Էդ երեխեն Ահարոնի տանն աշխատել է, զինծառայող է հիմա, առողջական խնդիր է ունեցել, վիրահատել են: Ահարոնի կինը գնում ա իրանց տուն, ասում ա՝ երեխի համար մենք էլ վեշ դնենք, որ գնում եք հիվանդանոց: Հիմա սա ուզում են սարքեն, թե իբր ընտրակաշառք ա առաջարկել: Էդ տղու մորն ասել են՝ արի գրի, գրել ա, հետո արդեն որ ջոկել ա, ոնց ա եղել, գնացել, ցուցմունքը փոխել ա, գրել ա, որ իրականությունն այլ է»,- պատմում են Վարդենիսում:
Կարդացեք նաև
Արմեն ԴԱՎԹՅԱՆ
