Քիչ առաջ պրոֆեսոր Արմեն Չարչյանը դատարանի դահլիճից ազատ արձակվեց: Նրա նկատմամբ խափանման միջոց ընտրվեց ստորագրությունը չհեռանալու մասին:
«Արդարադատությունն այսօր հաղթեց՝ շնորհիվ իմ փաստաբանների: Այսօր, իրապես, ինձ համար շատ լավ օր է, տրամադրությունս բարձր է, ոգիս միշտ շատ բարձր է եղել: Ես առողջական շատ լուրջ խնդիրներ ունեմ, որոնք այս 5 ամսվա ընթացքում ավելի են խորացել: 24-25 տարվա դիաբետը շատ վատ ձեւով արտահայտվեց: Առավել եւս՝ այս 4-5 ամսվա ընթացքում ես զրկված եմ եղել լրատվությունից: Առաջիկա իմ խնդիրը առողջությունս վերականգնելն է լինելու: Հետո՝ կտեսնենք»,-դատարանում լրագրողների հետ զրույցում ասաց Արմեն Չարչյանը:
Հարցին՝ սպասելի՞ էր դատարանի որոշումը, Արմեն Չարչյանն ի պատասխան ասաց՝ եթե Սահմանադրական դատարանը որոշում էր կայացրել, դատարանն այլ որոշում չէր կարող կայացնել:
Հարցին էլ՝ առաջին բանը, որ անելու է ազատ արձակվելուց հետո՝ ո՞րն է լինելու, պրոֆեսորն ասաց, որ արդեն արել է, կնոջը համբուրել է:
Կարդացեք նաև
Ասաց նաեւ, որ առողջությունը շատ վատթարացել է եւ քրեակատարողական հաստատությունում սրտի երկրորդ կաթվածն է ստացել, ուստի առայժմ զբաղվելու է առողջության վերականգնմամբ:
Հիշեցնենք, որ Արմեն Չարչյանի գործով ՀՀ Սահմանադրական դատարանի որոշման հիման վրա այսօր Առաջին ատյանի դատարանում արտահերթ դատական նիստ էր նշանակվել:
Լուսինե ԲՈՒԴԱՂՅԱՆ
