Ասում է դերասան Վահագն Թովմասյանը
– Վահագն, ինչու ընտրեցիր թատրոնը:
– Մեր կյանքում ոչինչ պատահական չի լինում:
Դպրոցական տարիներին տարբեր փառատոների էի մասնակցում՝ ասմունքի, երգի, այդպես էլ սիրեցի բեմն ու հանդիսատեսի վերաբերմունքը եւ ուղենշվեց իմ մասնագիտական ճանապարհը, որը, չնայած մի շարք դժվարություններին, հետաքրքիր ու միաժամանակ պատասխանատու է:
Կարդացեք նաև
– Թատրոնում երջանկանալը հե՞շտ է։
– Կարճ կպատասխանեմ՝ եթե թատրոնում ես, արդեն երջանիկ ես: Ասեմ, որ կլինեն մարդիկ, որ չեն համաձայնի ասածիս հետ, քանի որ ոչ բոլորի մոտ է թատրոնի հանդեպ պատկերացումները միատեսակ։
– Վահագն, թվում է՝ դեռ շուտ է խոսել հիասթափությունների մասին, բայց, այնուամենայիվ, կյանքումդ եղե՞լ են հիասթափություններ։
– Կյանքի տարբեր փուլերում են լինում հիասթափություններ, որոնք այս կամ այն կերպ են դրսեւորվում մարդկանց մոտ: Սա նաեւ ապրելուց, մարդկային փոխհարաբերություններից եւ աշխարհի նկատմամբ վերաբերմունքից է գալիս: Եթե քո տեսակի մեջ կարողանում ես ուժ եւ հավատ պահել, նաեւ շատ հեշտ է դառնում հիասթափություններն անցողիկ զգացողություն դարձնելը: Բայց, դրա հետ միասին պետք է նշեմ, որ լինում են այնպիսի հիասթափություններ, որոնք հարցեր են առաջացնում եւ ողջ կյանքում փորձում ես գոնե դրանց մի քանիսի պատասխանը գտնել:
– Մի առիթով Շիլլերն ասել է, որ լավ դերասանի համար գոյություն չունեն վատ դերեր։ Ինչքանո՞վ ես համաձայն այս մտքի հետ, եւ եթե գաղտնիք չէ, եղե՞լ են տարաձայնություններ քո դերերի հետ կապված։
– Համամիտ եմ… Ճիշտ է, ինձ ու իմ դերերի հետ կապված տարաձայնություններ չեն եղել, բայց այո, անծանոթ երեւույթ չէ, նման դեպքեր նույնպես լինում են դերասանների կյանքում: Պետք է կարողանալ սեփական «ես»-ից դուրս գալ եւ մտնել այն կերպարի հոգեվիճակի մեջ, որը քեզ է վստահվել: Եվ եթե դերասան ես, միանշանակ, պետք է կարողանաս…
– Հիմա մանկական ներկայացումներում ես խաղում։ Հե՞շտ է փոքրիկ հանդիսատեսին համոզելը…
– Միայն պետք է շատ սեր ու անկեղծություն դնես հիմքում, որովհետեւ փոքրիկները շատ զգայուն են ու առաջինը դու պետք է քեզ հավատաս, որ իրենք էլ հավատան։ Դրա համար պետք է անջատես արտաքին աշխարհն այնպես, որ նույնիսկ մարդկանց չտեսնես ու չնկատես, չզգաս այն, ինչ Վահագն է զգում կամ մտածում։ Սա է մանկական ներկայացման վերաբերյալ իմ մոտեցումը: Նաեւ կարեւորում եմ ռեժիսորի դերակատարությունը, որը դերասանին կօգնի շատ հարցերում:
– Ամանորյա տոներն են առջեւում, թատրոնում ինչպե՞ս են անցնում նախապատրաստական աշխատանքները։
– Ամանորին ընդառաջ երկու մանկական ներկայացման մեջ եմ խաղալու: Իհարկե, աշխատանքային եւ ստեղծագործական եռուզեռի մեջ ենք, որպեսզի կարողանանք ժպիտ պարգեւել մեր փոքրիկ հանդիսատեսին եւ նրանց օրը հեքիաթային դարձնել։
Զրուցեց
Վովա ԱՐԶՈՒՄԱՆՅԱՆԸ
«Առավոտ» օրաթերթ
08.12.2021
