«Նրանք, ովքեր պնդում են, որ 100%-ով ապահոված է սահմանային անվտանգությունը, այդ թվում՝ սոցիալ-կենցաղային, կամ խորը պատկերացում չունեն՝ ինչ է իրենից ներկայացնում առաջնագիծը, կամ ունեն նպատակ մոլորեցնելու հանրությանը եւ վառ գույներով ներկայացնելու ստեղծված իրավիճակը»,- այսօր լրագրողների հետ զրույցում, պատասխանելով ՔՊ-ական Ռուստամ Բաքոյանի գնահատականին, թե առաջնագիծը կահավորված է, ասաց «Պատիվ ունեմ» խմբակցության պատգամավոր Տիգրան Աբահամյանը:
Նա նշեց, որ երկու խնդիր կա այսօր. պատերազմից հետո նոր ձեւավորված բնագծի ձեւավորում, որը ենթադրում է ենթակառուցվածքներ, որոնք հնարավորություն կտային մատակարարումներ իրականացնել թիկունքային ապահովման եւ սպառազինության առումով: Եվ երկրորդ խնդիրը՝ հետպատերազմյան իրավիճակի նոր իրողությունները ստիպում են ՀՀ եւ Արցախին կտրուկ վերանայումներ իրականացնել առաջագծում իրականացվող ծառայության հարցում, որը մինչ այս պահը չի իրականացվել. «Իշխանության որոշ շրջանակներ կարծում եմ, նպատակային ձեւով, փորձում են առաջնագծում անհրաժեշտ ենթակառուցվածքների ստեղծումը, տեխնիկական կահավորումը ներկայացնել կենցաղային մակարդակում, օրինակ, վրանները բուդկաներով փոխարինելու տեսանկյունից, կամ փորձում են ցույց տալ, որ եթե մեկ դիրքում կան բետոնե պատնեշներ, ուրեմն մենք ունենք ամուր դիրքեր: Սահմանային ենթակառուցվածքը ենթադրում է ցանկացած պայմաններում պաշտպանական, հակահարձակողական, հարձակողական գործողություններ վարելու հնարավորություններ: Ստեղծված իրավիճակում ՀՀ իշխանությունները այդ խնդիրը որեւէ ձեւով չեն լուծել: Եթե լիներ 100% ապահովվածություն, մեկ-երկու օրվա ռազմական գործողությունների արդյունքում չէինք ունենա 6 զոհեր, 32 գերի, վիրավորներ: Ցավալիորեն, այս իրավիճակը հերթական քննությունն էր, որն արձանագրեց, որ այն խնդիրները, որոնք բարձրաձայնվել են այս ընթացքում ու այն հավաստիացումները, որ տվել են իշխանությանը, որեւէ աղերս չունեին իրականության հետ»:
Կարդացեք նաև
Հռիփսիմե ՋԵԲԵՋՅԱՆ
