«Ինչ-որ քաղաքացիների կողմից դագաղների, սեւ ժապավենների դեպքը ես անձամբ եմ նույն օրը քննադատել․․․Գեղամ Մանուկյանը երկար ժամանակ սեռական բնույթի հայհոյանքներ է գրում ֆեյսբուքում»,-ԱԺ լիագումար նիստում այսօր հայտարարեց խորհրդարանի նախագահ Ալեն Սիմոնյանը։ Նա նշեց․ «Ագնեսա Խամոյանը իմ եւ մյուսների նկարների տակ վիրավորանք է գրում։ Ու դուք եկել այստեղ վիրավորանքի մասին եք խոսո՞ւմ։ Պարոն Աղվան Վարդանյան, եթե ձեզ թվում է, թե գեղարվեստական ձեւակերպումներով կարող եք քողարկված վիրավորանքներ հնչեցնել եւ մնալ անպատասխան, սխալվում եք»։
Հիշեցնենք՝ ԱԺ-ն այս տարի ընդունել էր իշխանական «Իմ քայլը» խմբակցության հեղինակած փաթեթը, որով ծանր վիրավորանք հասցնելը՝ հայհոյելը, պատժվում է տուգանքով, իսկ պարբերաբար կրկնվելու դեպքում՝ մեկ ամիս կալանքով։
Կարդացեք նաև
«Հայաստան» դաշինքից Աղվան Վարդանյանն առաջարկում է անվավեր ճանաչել 137.1. հոդվածը, որը մասնավորապես սահմանում է՝ միեւնույն անձին ծանր վիրավորանք հասցնելը՝ հայհոյելը կամ նրա արժանապատվությունն այլ ծայրահեղ անպարկեշտ եղանակով վիրավորելը պարբերաբար կրկնելու դեպքում պատժվում է տուգանքով՝ նվազագույն աշխատավարձի հազարապատիկից երեքհազարապատիկի չափով կամ կալանքով՝ մեկից երեք ամիս ժամկետով: ՔՊ-ականները դեմ են արտահայտվում առաջարկին։
ՔՊ-ական Արուսյակ Ջուլհակյանն էլ իր հերթին հայտարարեց․ «Դագաղներն ու պսակները ներքաղաքական կյանքում հայտնվել են ոչ թե 2018թ-ին, այլ 2008թ․-ի նախընտրական քարոզչության ժամանակ, պարոն Հայկ Մամիջանյան, երբ մի խումբ երիտասարդներ դուդուկ էին փչում ու նվագում թեկնածու Լեւոն Տեր-Պետրոսյանի պատուհանի տակ»։
Ջուլհակյանը նաեւ հույս հայտնեց, որ ընդդիմությունն իր գործընկեր Գեղամ Մանուկյանին կասի․ «Գեղամ, սիրուն չէր այն, որ դու ընտրություններից առաջ որոշեցիր մայր հայհոյել մի քանի հարյուր հազար քաղաքացու»։
Լուիզա ՍՈՒՔԻԱՍՅԱՆ
