«Պարոն Կոնջորյան, ԱԺ ամբիոնը Perfect TV-ի մակարդակի մտքեր արտահայտելու համար չէ։ Եթե խոսում եք Ռոբերտ Քոչարյանի մասին, երեւակայության սահմանն էլ պետք է տրամաբանություն ունենա»,-ԱԺ լիագումար նիստում այսօր անդրադառնալով իշխանական խմբակցության մեղադրանքներին, թե խորհրդարանական ընդդիմությունն ու իր ղեկավար Ռոբերտ Քոչարյանն ինչ-ինչ պայմանավորվածությունների մեջ են Ադրբեջանի իշխանության հետ՝ ասաց «Հայաստան» դաշինքի պատգամավոր Արամ Վարդեւանյանը։
«Եկեք դուք էլ ձեր խիղճը մի քիչ թեթեւացրեք եւ ընդունեք, որ Ալիեւը հաստատ վատ երազներում է տեսնում Քոչարյանին, իսկ Նիկոլ Փաշինյանը 2018թ․-ից օպերատիվ կապը պահում է, գաղտնի բանակցություններ անում է, մայիսի ութին էլ Շուշիի ազատագրման օրը կալանավորման տակ է պահում Ռոբերտ Քոչարյանին»,-հավելեց Արամ Վարդեւանյանը։
«Արցախն էլ բանակցային սեղանից դուրս է թողնում»,-միջամտեց ԱԺ նախագահ Ալեն Սիմոնյանը՝ նկատի ունենալով Ռոբերտ Քոչարյանին։ Ապա Ալեն Սիմոնյանը նշեց․ «Գուցե իրավական հարցերից բավականին տեղեկացված եք, պարոն Վարդեւանյան, բայց բանակցային հարցերի մանրուքների մեջ մի մտեք, որովհետեւ այդտեղ ջախջախիչ պարտություն կկրեք»։
Կարդացեք նաև
ՔՊ-ական Վահագն Ալեքսանյանն էլ օպերատիվ կապի հիշատակմանն ի պատասխան հիշեցրեց Հեյդար Ալիեւի հետ գառ ուտելը․ «Կամ առաջարկ անելը, ուսին ձեռքը դրած եւ բերանը բացած նկարվելը»։
Լուիզա ՍՈՒՔԻԱՍՅԱՆ
