Վանաձոր խոշորացված համայնքի ՏԻՄ ընտրություններին մասնակցած «Լուսավոր Հայաստան» կուսակցությունը համաձայն չէ ընտրությունների նախնական արդյունքների հետ: Ընտրական ցուցակը գլխավորող Հրանտ Այվազյանը հայտնեց, որ կուսակցությունը դիմել է ՏԸՀ, որ կատարեն վերահաշվարկ:
Իրենց կարծիքով՝ վերահաշվարկի ենթակա են 23/13, 23/19, 23/32, 23/36, 23/40, 23/45, 23/46, 23/55 ընտրական տեղամասերի արդյունքները: «Մենք կասկածներ ունենք, որ տվյալ տարածքներում մենք ունենք վավեր քվեաթերթիկներ, այդ պատճառով դիմել ենք վերահաշվարկի: Տեղեր ենք ունեցել, որ վստահված անձինք նկատել են որոշ բաներ, թերահավատություն եւ այդ է պատճառը, որ վերահաշվարկ լինի»,- Aravot.am-ի հետ զրույցում ասաց Հրանտ Այվազյանը:
Այվազյանն ասաց նաեւ, որ եղել են ընտրական տեղամասեր, որտեղ հաշվարկի ժամանակ կուսակցությունը չի ունեցել վստահված անձինք: Այդ տեղամասերում եւս ցանկանում են վերահաշվարկ կատարել: Իսկ օրն ու ժամը դեռեւս հստակեցված չէ:
Իսկ խոսելով ընդհանուր ընտրական օրվա մասին՝ կուսակցության ներկայացուցիչը նշում է, որ ակնառու խախտումներ չեն նկատել. «Ընտրության հետ կապված, կարծում եմ, էական խախտումներ չկան: Մի քանի տեղ նկատել ենք, որ ընտրատեղամասում պաստառներ են փակցված, տեղեկացրել ենք, հանվել են»:
Կարդացեք նաև
Տաթեւիկ ՂԱԶԱՐՅԱՆ
