«Ես ուզում եմ հանրության ուշադրությունը հրավիրել մի քանի հրապարակումների վրա, որոնք տեղի ունեցան Սոչիի հանդիպումից հետո….Այդ հանդիպումից հետո թե Էրդողանը, թե Ալիեւը խոսում են այն մասին, որ այսպես կոչված «Զանգեզուրի միջանցքն» իրականություն է դառնում: Դա արդեն ոչ թե բարիդրացիական հարաբերությունների լեզվով է, այլ սպառնալիքի: Մեր քաղաքացիները պետք է հասկանան, որ խաղաղության դարաշրջանն ի սկզբանե եղել է մեռելածին թեզ, եւ այն վերջնականորեն տապալվել է: Դա արձանագրվել է հատկապես Սոչի հանդիպումից եւ դրա արդյունքներից հետո հայտարարություններով»,- «Հայելի» ակումբում ասաց «Հայրենիք» կուսակցության մամուլի խոսնակ Սոս Հակոբյանը:
«Մեր թշնամին եւ նրա աջակից տարածաշրջանային տիրությունները՝ Թուրքիան, բացեիբաց ասում են, որ իրենց համար Զանգեզուրի միջանցքը կարմիր գիծ է հարաբերությունները կարգավորելու առումով, եւ այլընտրանքը պատերազմն է: Մենք ունենք բավականին անկեղծ թշնամի, որը ի տարբերություն մեր իշխանությունների՝ չի փորձել փափուկ բարձ դնել մեր գլխի տակ: Իրենք միշտ հայտարարել են, որ շատ ագրեսիվ եւ վճռական են տրամադրված:
Եվ փոխարենը մեր պետությունն ամբողջապես ռեսուրսը կենտրոնացներ պետական ապարատը եւ զինված ուժերը վերականգնելու վրա, տարբեր տեղերից հասած տեղեկություններով, սակայն, նրանց տրամադրություններն այնպես են դասավորվել, որ մեկ է պարտված բանակ է, էլ ինչու պետք է պետությունը հավելյալ միջոցներ ծախսի, գերջանքեր գործադրի, որպեսզի բանակը կամ սպառազինությունը վերականգնվեն:
Այս իշխանությունների մեկ տարվա քաղաքականության արդյունքն այսօր մենք տեսնում ենք՝ պաշտպանունակ չենք, մեր զինված ուժերը, պետական համակարգը այն վիճակում չեն, որ հաջողությամբ դիմագրավեն թշնամական ագրեսիային: Էլ չեմ խոսում այն մասին, որ մեր գլխավոր բանակցողն ավելի շատ դիմացի կողմից է բանակցում, զբաղված է սեփական ժողովրդին մանիպուլացնելով եւ լավ կյանքի ու խաղաղության խաբկանք ստեղծելով»,-ընդգծեց «Հայրենիք» կուսակցության մամուլի խոսնակը:
Կարդացեք նաև
Գոհար ՀԱԿՈԲՅԱՆ
