«Հայաստան» խմբակցության քարտուղար Արծվիկ Մինասյանն այսօր ԱԺ-ում լրագրողների հետ զրույցում ասաց, որ նախորդ քառօրյային բոյկոտեցին ու չմասնակցեցին քննարկմանը, որովհետեւ իշխող մեծամասնությունը մերժեց արտահերթ նիստ հրավիրելու հարցը: Առաջարկում են, որ հրավիրեն ՊՆ նախարարին, արտգործնախարարին, Նիկոլ Փաշինյանին, բայց իրենց առաջարկը մերժում են. «Եթե դուք փակ նիստ եք անում, հարազատներին չեք տեղեկացնում, Նիկոլ Փաշինյանին չեք հրավիրում, իմաստը ո՞րն է փակ նիստի, ո՛չ դուք եք տիրապետում տեղեկատվությանը, ո՛չ էլ կարողանում եք հարց լուծել: Ձեր ուշքն ու միտքը սեւեռել եք կառավարությանը, որ կառավարության ղեկավարը փռշտա՝ վազեք, ասեք առողջություն»:
Հարցին՝ ընդդիմության գործողությունները համարժե՞ք են իշխանության քայլերին՝ Մինասյանը պատասխանեց, որ համարժեք չի եղել ու այն թերություններն ու սխալները, որոնք պայքարի ընթացքում բացահայտել են՝ հիմա փորձում են շտկել:
Հարցին՝ եթե իրոք ուզում եք ԱԱԾ տնօրենի հետ հանդիպում ունենալ, ինչո՞ւ չեք գնում այնտեղ ու պահանջում հանդիպում՝ Արծվիկ Մինասյանը պատասխանեց. «Դուք կասկածո՞ւմ եք, որ մենք անկեղծորեն ցանկանում ենք, որ վիճակը փոխվի՞: Աբազյանը ու կառավարության անդամները ենթակա են պառլամենտին»:
Հարցին՝ ինչո՞ւ նախագահը ձեր թիրախում չի հայտնվում՝ Մինասյանը պատասխանեց, որ բոլոր պաշտոնատար անձինք, որոնք քիչ թե շատ առնչություն ունեն, իրենց թիրախում են:
Կարդացեք նաև
Հռիփսիմե ՋԵԲԵՋՅԱՆ
