«Մի շարք համայնքներում ընտրություններ կայացան, «Հայրենիք» կուսակցությունն էլ մասնակցեց 5 համայնքներում, որոնցից 4-ում՝ Արտաշատում, Վայքում, Աշտարակում, Վանաձորում ունենալու է մասնակցություն ավագանու կազմում: Վանաձորում շատ հետաքրքիր իրավիճակ է ստեղծվել: Գործող քաղաքապետ Մամիկոն Ասլանյանը բավականին շատ ձայներ է ստացել, եւ հնարավորություն կա ընդդիմադիր ուժերի համաձայնությամբ ՔՊ-ին թողնել փոքրամասնություն Հայաստանի Հանրապետության երրորդ քաղաքում»,- «Հայելի» ակումբում գնահատելով ՏԻՄ ընտրությունների արդյունքները՝ նշեց «Հայրենիք» կուսակցության մամուլի խոսնակ Սոս Հակոբյանը:
Նրա խոսքով, այդպիսի հնարավորություն կա նաեւ Վայքում, եթե 3 ուժերը՝ «Հայրենիքը», «Ազատականը» եւ «Հանրապետությունը» միանան. «Եթե այդ ուժերն իրենց իսկապես ընդդիմություն են համարում, պարտավոր են այդ համաձայնությանը գնալ: «Հայրենիք» կուսակցության թեկնածուն մեր կենտրոնական շտաբից ստացել է հանձնարարական՝ ցանկացած եղանակով համաձայնության գալ, որպեսզի տեղում ՔՊ-ն այլեւս չունենա իշխանություն»:
Սոս Հակոբյանը նշեց, որ դեռեւս նոյեմբերին իրենք ասում էին, որ ՔՊ-ի պարտությունների շքերթը բացված է, եւ այդ առումով շատ կարեւոր են ՏԻՄ ընտրությունները, թեեւ շատերը քննադատում էին դրանց անցկացումը: «ՏԻՄ ընտրությունները շատ լավ սոցհարցում եւ ուսումնասիրություն էին հանրային տրամադրությունների, որոնք հունիսի 20-ից հետո շեշտակի փոխվել են»:
Գոհար ՀԱԿՈԲՅԱՆ
