«Ակնհայտ դարձավ, որ ԱԺ քաղաքական մեծամասնությունը որեւէ կերպ չի ուզում անդրադառնալ սահմանազատման-սահմանագծման գործընթացին։ Մենք հնարավորություն տվեցինք անգամ փոփոխություններ անել նախագծում, որ իրենց մատնանշած իբրեւ թե մտահոգությունները վերանան, բայց դա էլ չարեցին»-խորհրդարանում լրագրողների հետ ճեպազրույցում այսօր ասաց «Հայաստան» խմբակցության պատգամավոր Արմեն Ռուստամյանը։
Հիշեցնենք, որ ԱԺ արտաքին հարաբերությունների հանձնաժողովի այսօրվա նիստում ՔՊ-ն մերժեց սահմանազատման-սահմանագծման մասին ԱԺ հայտարարության նախագծի ընդունումը, որը հեղինակել էր «Հայաստան» խմբակցությունը։ Ըստ ՔՊ-ի՝ դրանում ներքաղաքական ձեւակերպումներ կան եւ ՀՀ շահերին վնասող դրույթներ․ նիստը փակ անցավ։
«Իրենք խուսափում են հրապարակայնացնել այն գործընթացը, որն այսօր տեղի է ունենում ժողովրդի թիկունքում։ Մենք ուզում էինք սրանով հասնել նրան, որ մեր շահերն ամրագրվեին սահմանագծման-սահմանազատման գործընթացում։ Իրենք պատճառաբանեցին, թե «զգայուն հարցեր» կան, դրա համար փակ պետք է անել։ Այո, կան զգայուն հարցեր, ու որպեսզի դրանք չդառնան ողջամիտ կասկածներ, պետք է քննարկվեն։ Այսինքն, իրենք չեն թաքցնում, որ կան լուրջ՝ կուլիսային գործընթացներ՝ մեր զգայուն խնդիրների հետ կապված»,-համոզմունք հայտնեց Արմեն Ռուստամյանը։
Կարդացեք նաև
Նրա բնորոշմամբ՝ սահմանազատման-սահմանագծման շուրջ բանավոր եւ կործանարար հետեւանքներին մենք ականատես ենք լինում միայն «պոստֆակտում» ձեւաչափով, ինչը սպառնալիք է մեր շահերին․ «Մեր հայտարարությունը սա կանխելու համար էր, իսկ իրենք դա մերժեցին ու ամրապնդեցին համոզմունքը, որ կա բանավոր գործընթաց։ Իրենց ասածն այն է, որ իրենց ղեկավարը «գիտի ինչ է անում»․․․մեր բանաձեւը շոշափում էր այն կարմիր գծերը, որոնք հատել չի կարելի։ Այն մերժելով՝ իշխանությունը հաստատեց, որ արդեն կատարվել են բանավոր զիջումներ, որոնք եթե հիմա ֆիքսենք՝ կստացվի, որ գործադիրն ԱԺ-ին հակառակ է գործել։ Իսկ դա կառավարությանն անվստահություն հայտնելու հիմք է։ Կառավարությունն է բխում ԱԺ-ից, ոչ թե հակառակը»։
Լուիզա ՍՈՒՔԻԱՍՅԱՆ
