Հայաստանում արտադրվելու է «Սպուտնիկ Լայթ» պատվաստանյութը: Այսօր այս մասին ասուլիսում հայտնեց «Լիկվոր» ընկերության գլխավոր տնօրեն Սերգեյ Մաթեւոսյանը: Ընդ որում, ոչ թե պատվաստանյութի «շշալցում» է իրականացվելու, այլ պատվաստանյութը զրոյից արտադրվելու է մեր երկրում:
«Սպուտնիկ Լայթ»-ը նաեւ արտահանվելու է այլ երկրներ:
Սերգեյ Մաթեւոսյանն ասաց, որ Ռուսաստանից ստացվող սուբստրատը վերամշակվելու է, առաջնային եւ երկրորդային փաթեթավորում ստանալու եւ սառնարանային պայմաններում պահպանվելու է. «Սա կարեւոր հաջողություն էր թե՛ մեր ընկերության համար, թե՛ մեր երկրի համար «Լիկվոր»-ը գործում է արդեն 30 տարի եւ ունի 3 GMP սերտիֆիկատ՝ ազգային, ԵվրԱզեսի եւ «Պիկես» միջազգային սերտիֆիկատ, ինչը թույլ է տալիս արտադրանքի 70 տոկոսը արտահանել Եվրազիայի, Կենտրոնական Ասիայի եւ Միջին Արեւելքի երկրներ»:
Դեղագործական ընկերության ղեկավարը նաեւ նշեց, որ հիմնականում արտահանելու են, քանի որ մեր երկրի մեկ տարվա պահանջարկը կարող են բավարարել 3 օրվա ընթացքում:
Կարդացեք նաև
ՀՀ էկոնոմիկայի նախարար Վահան Քերոբյանն ասաց, որ այս պահին մի շարք երկրների հետ բանակցում են պատվաստանյութն արտահանելու ուղղությամբ, սակայն արտահանման պայմանագրեր դեռ չկան: Ըստ նրա, պատվաստանյութը հիմնականում կարող է արտահանվել Մերձավոր Արեւելք եւ Աֆրիկա:
Ասուլիսին ներկա առողջապահության նախարար Անահիտ Ավանեսյանը նշեց, որ պետությունը գնելու է Հայաստանում արտադրված «Սպուտնիկ Լայթ»-ը նույնպես, ինչպես գնում է բոլոր մյուս պատվաստանյութերը, սակայն դրանք քաղաքացիներին անվճար են տրամադրվելու:
Լուսինե ԲՈՒԴԱՂՅԱՆ
