«Ուզեն, թե չուզեն, Արթուր Սարգսյանին 3 շաբաթից ազատելու են, որովհետեւ վաղեմության ժամկետն է ավարտվում: Եթե վաղեմության ժամկետն անցնում է, ապա գործի քննություն կարող է տեղի ունենալ, բայց կալանավորում չի կարող լինել»,- այսօր լրագրողների հետ զրույցում ասաց «Հայաստան» խմբակցության պատգամավոր Արամ Վարդեւանյանը:
Նա նշեց, որ այսօր մի խումբ պատգամավորներով ուղեւորվում էին Սյունիքի մարզ, որտեղ պետք է լիներ Արթուր Սարգսյանի դատավարությունը, գնում էին՝ անձնական երաշխավորություն տալու. «Դատավորը, իմանալով, որ մարդը կալանավորված է, անձնական ազատության հարց ունի, պարզվում է՝ այսօր առավոտյան նրա առողջական վիճակը վատացել է»: Սա Վարդեւանյանը որակեց խայտառակություն ու մարդու իրավունքների ծաղր:
Ըստ նրա, մարդու անձնական ազատության հարցը հետաձգել չի կարելի ու իմանալով, որ Արթուր Սարգսյանը 20 օրից ազատության մեջ է լինելու, ապօրինի նրան կալանավորել ու պահում են. «Այդ ի՞նչ առողջական խնդիր նա պետք է ունենա: Եթե ստանձնում ես դատավորի պաշտոնը, պետք է նաեւ զրկանքներ կրես»:
Կարդացեք նաև
Վարդեւանյանը նշեց, որ այսպիսի խայտառակ վիճակում Հայաստանի դատական համակարգը երբեւէ չի եղել, երբ դատավորը նիստից մի քանի ժամ առաջ «ստիպված հիվանդանա»:
Հռիփսիմե ՋԵԲԵՋՅԱՆ
