«Իշխանությունը խնդիր է դրել՝ մեկուսացնել այն մարդկանց, որոնց անունները ասոցացվում են պայքարի, հայրենիքը պաշտպանելու հետ,- այսօր «Հայելի» ակումբում՝ անդրադառնալով «Սիսական» ջոկատի հրամանատար Աշոտ Մինասյանին եւ Սյունիքի համայնքապետերին կալանքի տակ պահելուն՝ ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը:- Ցավալիորեն, ես Աշոտ Մինասյանի հետ հանդիպելու հնարավորություն չեմ ունեցել, բայց գիտեմ նրա անցած ճանապարհը: Բոլոր պատերազմների մասնակից, ուղղակի իր հայրենիք սիրող մարդ է: Եվ այս պայմաններում ուղղակի անբարոյականություն է նրա նկատմամբ ինչ-որ կեղծ, շինծու գործի հիման վրա ոչ միայն քրեական գործ հարուցելը, այլեւ ազատությունից զրկելը, կալանավորելը:
Մեր խորհրդարանական գործընկերներից էլ այսօր շատերը շարունակում են մնալ անազատության մեջ: Նրանք բոլորը կալանավորված են ապօրինի ձեւով: Այսինքն, այն մարդիկ, որոնք հայրենիքի, հայրենիքի ազատության համար ելել են պայքարի, փաստացի այդ մարդկանց են առաջին հերթին մեկուսացնում: Կրկնում եմ, ապօրինի եւ շինծու գործերով: Բայց այս եւ նախորդ շրջափուլերում ՏԻՄ ընտրությունները ցույց տվեցին, որ նույնիսկ այդպիսի ռեպրեսիաները որեւէ ձեւով չեն ազդում հասարակական այս զարթոնքի եւ հասարակական համախմբման վրա»:
Աշոտ ՀԱԿՈԲՅԱՆ
