Հարցազրույց երգահան Գայանե Թադեւոսյանի հետ
Ամերիկաբնակ մնջախաղաց, կինոդերասան, ռեժիսոր, սցենարիստ Արթուր Դեր Թումասյանը ֆիլմ է նկարահանել, որը առաջին անգամ կցուցադրվի Ամերիկայում` 2022 թվականի փետրվարին։ Լինելու է երկու լեզվով՝ հայերեն, անգլերեն։ Ֆիլմի երաժշտության հեղինակը երգահան Գայանե Թադեւոսյանն է, ում հետ խոսել ենք ֆիլմի եւ իր գրած սաունդթրեքի վերաբերյալ։
– Ինչպե՞ս դիմեցին ձեզ, որ հենց դուք ֆիլմի երաժշտությունը գրեք:
-Մոտավորապես մեկ տարի առաջ համշենական երգերից մեկի մշակումն էի արել, որտեղ օգտագործված էր բացառապես իմ ձայնը` առանց որեւէ երաժշտական գործիքների։ Երգը բավականին մեծ տարածում գտավ համացանցում։ Մի օր էլ անսպասելիորեն Ամերիկայից նամակ ստացա։ Գրողը ամերիկաբնակ մնջախաղաց, կինոդերասան, ռեժիսոր, սցենարիստ Արթուր Դեր Թումասյանն էր, ով պատրաստվում էր Հայաստանում իր հերթական ֆիլմերից մեկը նկարել եւ հենց այդ կապակցությամբ էլ առաջարկեց համագործակցել։ Իր խոսքով` ֆիլմում մի հատված կար, որը նայելիս անընդհատ իմ ձայնն ու կատարումն էր լսում։
– Ինչի՞ մասին է ֆիլմը:
– Ինչպես նշեցի` ֆիլմի հեղինակն Արթուր Դեր Թումասյանն է։ Ֆիլմը կոչվում է «Փոստատարի վերջին նամակը»։ Ինչպես ինքը` հեղինակն է ասում` յուրաքանչյուր մարդ իր կյանքի ընթացքում գոնե մեկ անգամ ինչ-որ մեկի մեջ պետք է հրեշտակ տեսնի։ Որովհետեւ այդ հրեշտակները թեւերով չեն լինում ու չեն թռչում, դրանք մեր մեջ են։
– Բացի ԱՄՆ-ից, որտե՞ղ է ցուցադրվելու ֆիլմը։
– Նախատեսվում է ֆիլմը ներկայացնել նաեւ Կանադայում կայանալիք կինոփառատոներին։ Հայաստանում նույնպես ցուցադրվելու է, սակայն դեռեւս հստակ ժամանակացույց չկա։
Եվ, եթե ամեն բան նախատեսվածի պես ընթանա, ես եւ ֆիլմի գլխավոր դերակատարներից մի քանիսը ներկա կգտնվենք Ամերիկայում կայանալիք առաջին ցուցադրությանը։
– Հետագայում նշված երկրների կինոթատրոններում եւ հեռուստատեսությամբ կցուցադրվի՞։
– Դա թող լինի մեր փոքրիկ անակնկալը։
– Ձեր կարծիքը կասե՞ք սպասվող ֆիլմի վերաբերյալ:
– Ֆիլմից միայն մի քանի կադրեր եմ տեսել, բայց կարծիքս միանշանակ դրական է, որովհետեւ այն ասելիք ունի առաջին հերթին։ Եվ շատ ուրախ եմ, որ մի ֆիլմում, որտեղ հույսը, հավատն ու սերն իրենց խորը արմատներ են գցել, ես նույնպես իմ փոքրիկ անկյունն ունեմ։
-Քանի՞ ֆիլմի համար եք երաժշտություն գրել:
-Դեռեւս` երկու։ Մի քանի առաջարկներ եւս ստացել եմ, բայց դրանք այժմ դիտարկման փուլում են։
Զրուցեց
Լիանա ԽԱՉԱՏՈՒՐՅԱՆԸ
«Առավոտ» օրաթերթ
03.12.2021
